Екі елдің жүк тасымалы 26 есе артқан

Енді Қазақстан мен Әзербайжан автомобильмен тасымалданатын жүктер үшін электронды рұқсат қағаздармен алмасады. Жаңа жүйе келер жылдан бастап енгізіледі. Соның арқасында квота беру уақыты 10 күннен 5 минутқа дейін қысқармақ. Айта кету керек, бұндай жаңашылдық бұған дейін Қытай және Өзбекстан елдерімен де бірлесе қолға алынған. 

Қазақстан мен Әзербайжан жаңадан жанданған Жібек жолы бойындағы стратегиялық хабқа айналып келе жатқан қос мемлекет. Шығыстан батысқа баратын жүктердің басым бөлігі осы екі ел аумағы арқылы өтеді. Статистиканы сөз етсек, былтыр 287 контейнерлік пойыз тасымалданған. Бұл көрсеткіш 2023 жылмен салыстырғанда 26 есе артқан. Ал биыл 9 ай ішінде өсім 39%-ға жетті. 

Енді арадағы қатынас одан әрі арта түседі. Себебі, қос тарап халықаралық автокөлік тасымалдары үшін электронды рұқсат қағаздарын енгізбек. Өйткені Транскаспий халықаралық бағытында Қазақстан мен Әзербайжан арасында жүктердің басым бөлігі паромға тиелген автокөліктермен тасымалданады. Бұл жаңа жүйе келер жылдан бастап жүзеге асырылмақ. Тың жаңашылдық осы күнге дейін Қытай және Өзбекстан елдерімен бірлесе қолға алынған болатын. 

Дінмұхамбет Хасенов, ҚР Көлік министрлігі автомобиль көлігі және көліктік бақылау комитетінің басқарма басшысы:

- Бұл, біріншіден, бланктардың, рұқсат қағаздардың қолдануын, бақылауын күшейтеді. Бұрын 10 күн уақыт кететін болса, қазір 5 минуттың ішінде электрондық жүйеде ауыстыра салуға болатын болады және Қытай Халық Республикасының тәжірибесін алғанда, электрондық бланкқа көшкелі бері біз квота обменінің санын 23-ші жылмен салыстырғанда төрт есеге көбейттік. Енді Әзірбайжанмен алысқаннан кейін біз Әзірбайжан Республикасымен де осы квота обменін көбейтіп, халықаралық қатынаста, халықаралық перевозкаларды біз дамытамыз деп ойлаймын.

Айта кету керек, бауырлас екі ел арасындағы қатынас тек теңізбен шектелмейді. Әуе арқылы да Әзербайжанға жету жеңіл. Бүгінде арада 31 тұрақты рейс орындалады.

Әділет Көбенов, ҚР Көлік министрлігі азаматтық авиация комитетінің басқарма басшысы:

- Екі ел арасында авиарейстер саны ұлғайып жатыр. Өткен жылға көрсеткішпен салтырсақ, өткен жылы аптасына 18 рейс орындалған. Яғни 1,5 есе рейстер саны асып отыр.

Жалпы екі мемлекет арасында аптасына жеті рейс жүк рейстері орындалады.

Екі мемлекет арасында рейстер орындау үшін тиісті құқықтық база орнатылған. Жалпы оған сәйкес енді қазақстандық және әзербайжандық авиакомпаниялар өздерінің жоспарларын жүзеге асырады. Қай бағыт бойынша қызығушылық танытса, сол бағыт бойынша рейстер ашуға мүмкіндіктер бар.

Халықаралық жүк тасымалын дамытуға бағытталған жүйелі өзгерістер енді өз жемісін береді деген сенім бар. Себебі, қазір Қазақстан арқылы өтетін Транскаспий халықаралық көлік дәлізіне деген қызығушылық жоғары. Бұл бағыттың дамуы еліміздің транзиттік әлеуетін күшейтіп, өңірлік сауда байланыстарын жаңа деңгейге шығармақ.