Екібастұзда алғашқы ферроқорытпа зауыты ашылды

Республика күні қарсаңында Екібастұз қаласында KazFerroLimited ЖШС-ның өңірдегі алғашқы ферроқорытпа зауытының салтанатты ашылу рәсімі өтт, – деп хабарлайды  Aikyn.kz.

Жалпы құны 30,4 млрд теңгені құрайтын бұл жоба - Павлодар облысы аумағында жүзеге асырылуы жоспарланған үш ірі өндірістік кешеннің алғашқысы. Барлық нысандар іске қосылғаннан кейін Қазақстан қара және түсті металлургияда, машина жасау, көлік және басқа да өнеркәсіп салаларында кеңінен қолданылатын стратегиялық маңызды материал - ферроқорытпа өндірісі бойынша әлемде екінші орынға шығуға мүмкіндік алады.

Зауыт халықаралық экологиялық және технологиялық қауіпсіздік стандарттарына толық сәйкес келетін екі заманауи электр пештерімен жабдықталған. Жоғары технологиялық кәсіпорын 99,9% тиімділікпен ауаны тазартуды қамтамасыз ететін заманауи гибридті сүзгілермен жабдықталған және ең жоғары экологиялық талаптарға жауап береді.

Жобаны жүзеге асыру аясында 350-ден астам жаңа жұмыс орны құрылады және бұл өңірдің әлеуметтік-экономикалық дамуына елеулі серпін береді.

Зауыттың ашылу салтанатына Павлодар облысының әкімі Асайын Байханов қатысып, Мемлекет басшысы Қасым-Жомарт Тоқаев белгілеген негізгі міндеттерге жауап беретін жобаның стратегиялық маңыздылығын атап өтті, бұл - өңдеу өнеркәсібін жедел дамыту, шикізат экспортына тәуелділікті азайту және өңірлерде экономикалық өсімнің жаңа бағыттарын қалыптастыру.

- Бұл тек жаңа өндірісті іске қосу ғана емес, бұл - Павлодар облысы аумағында Қазақстанды ферроқорытпа өндірісі бойынша әлемдік көшбасшылар қатарына қосуға қабілетті толыққанды металлургиялық кластерді құруға бағытталған стратегиялық қадам. Екібастұз еліміздің негізгі өндірістік орталықтарының біріне айналуда, ал бүгінгі оқиға өңірдің индустриялық дамуының жаңа кезеңінің басталуын білдіреді, - деді облыс әкімі.

Салтанатты шара барысында облыс әкімі Асайын Байханов пен KazFerroLimited ЖШС-ның бас директоры Қайрат Нүкенов символдық түрде алғашқы электр пешін іске қосу рәсіміне қатысты. Іс-шараның ресми бөлігі аяқталғаннан кейін өңір басшысы жаңа кәсіпорынның негізгі өндірістік аймақтарын аралап, технологиялық үдерісті толық бақылауда ұстайтын операторлық бөлімге барды. Сонымен қатар жоғары технологиялық индустриялық нысанның жасалу сәтіне, яғни металың алғашқы құйылу процесіне куә болды.

KazFerroLimited ЖШС ферроқорытпа зауытының ашылуы - инвестициялардың тек экономиканы ғана емес, сонымен бірге өңірдің әлеуметтік ахуалын да өзгертетінінің жарқын мысалы. Бұл жобаның іске асырылуының арқасында жоғары еңбекақы төленетін жұмыс орындары құрылуда, озық технологиялар енгізілуде және елдің өнеркәсіптік егемендігі нығаюда.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.