Павлодар облысында ферроқорытпа зауыты іске қосылды

Республика күні қарсаңында Екібастұзда жаңа ферроқорытпа зауыты іске қосылды.

Кәсіпорынның қуаттылығы жылына 60 мың тонна ферро-силиций өндіруге жетеді. Бұл жоба - елдегі өңдеу өнеркәсібін дамыту және экономиканы әртараптандыру бағытындағы жұмыстың жемісі -дейді мамандар. Әрі Президент  қойған міндеттердің табысты орындалуын көрсетеді.  Бүгінде кеншілер қаласында темір жол кластері қалыптасып, металлургия саласы қарқынды дамып жатыр.

Бұл – Павлодар облысында құрылысы жоспарланған ірі өндірістік кешеннің алғашқысы. Жобаның құны 30 млрд теңгеден асады.

Асайын Байханов, облыс әкімі:

- Екібастұз қаласының индустриалдық аймағында үш зауыттың құрылысы жүріп жатыр. Біріншісі ашылды, екіншісін біз қараша айының басында ашамыз деп көздеп отырмыз. Ол зауыт, бұл зауыттан екі есе үлкен. Ол жерде 140 мың тоннаға дейін қуаттылығы бар. Бұл үш ферроқорытпа зауыты толықтай іске қосылғаннан кейін еліміз дүниежүзінде ферроқорытпа өндірісі бойынша екінші орынға шығады.

Мамандардың айтуынша зауыт толық экологиялық талапқа сай.   Орнатылған гибридтік сүзгілер ауаға тарайтын қалдықтың 99,9 пайызын ұстап қалады. Жоғары технологиялы өндіріс  өңірдің  әлеуметтік тұрақтылығына оң әсер етеді.

Қайрат Нүкенов, «Kazferro Limited» компаниясының бас  директоры:

- Кәсіпорында негізінен Екібастұз қаласының тұрғындары жұмыс істейді. Ал кейбір мамандарды басқа қалалар мен өңірлерден шақырдық. Толық қуатқа шыққанда жылына 1,2 миллиардтан 2 миллиард теңгеге дейін салық төлеуді жоспарлап отырмыз. Сонымен қатар жұмысшыларымыз үшін жаңа тұрғын үйлер салу жоспарда бар.

Жаңа кәсіпорында 370 адам жұмыспен қамтылады. Жалпы Павлодар облысы бойынша 30-дан астам инвестициялық жоба жүзеге асуда.

Авторлары: Қарлығаш Қасиетова, Дәулет Қошқарбаев, Марат Игіліков