​Экология министрлігі Іле Балқаштағы жолбарыстың суреті жалған екенін ескертті

Қазақстан Республикасы Экология және табиғи ресурстар министрлігі әлеуметтік желіде «Іле-Балқаш» мемлекеттік табиғи резерватында түсірілді деп тараған жолбарыстың суретін жалған деп теріске шығарды.

Ведомство бұл суреттің шындыққа жанаспайтынын және оның жасанды интеллект көмегімен жасалған белгілері бар екенін мәлімдеді.

Бұған дейін резерват аумағына жіберілген аналық жолбарысқа GPS-қарғыбауы орнатылған. Мамандар оның орналасқан жері мен жағдайын тәулік бойы бақылап отыр, сондықтан жануардың кездейсоқ түсірілгені туралы ақпарат шындыққа сәйкес келмейді.

Экология министрлігі азаматтар мен БАҚ өкілдерін кез келген мәліметті жарияламас бұрын оны тексеруге және тек ресми дереккөзге сүйенуге шақырды.

Ведомство, сондай-ақ, көрінеу жалған ақпарат таратқаны және шынайы емес фото мен бейнематериалдарды жариялағаны үшін Қазақстан заңнамасына сәйкес жауапкершілік қарастырылғанын еске салды.

Бүгін, 16:56