Экологияның​ ​Атырау тұрғындарының денсаулығына әсерін ДДСҰ сарапшылары зерттейді

Астанада өтіп жатқан 2026 жылғы Өңірлік экологиялық саммит аясында Атырау облысының әкімдігі, Қазақстан Республикасының Денсаулық сақтау министрлігі және Дүниежүзілік денсаулық сақтау ұйымының Еуропалық өңірлік бюросы өзара түсіністік туралы меморандумға қол қойды.

Құжатқа Атырау облысы әкімінің орынбасары Жасұлан Бисембиев, ҚР Денсаулық сақтау министрі Ақмарал Әлназарова және ДДҰ/Еуропа өңірлік директоры Ханс Хенри П. Клюге қол қойды.

Меморандум Атырау облысы мен Каспий өңірінде қоршаған орта факторларының халық денсаулығына әсерін зерттеу және бағалау бойынша ынтымақтастықты күшейтуді көздейді.

Атырау облысы — Қазақстандағы ең ірі мұнай-газ өңірлерінің бірі. Сондықтан экологиялық жүктеменің адам денсаулығына ықпалын жүйелі түрде бағалау қажеттілігі бұрыннан айтылып келеді.

Жаңа меморандум ДДҰ-ның техникалық қолдауымен әзірленген 2026–2029 жылдарға арналған Жол картасына негізделген. Құжат келесі бағыттарды қамтиды:

экология және денсаулыққа қатысты деректерді біріктіру және талдау; қоршаған орта факторларының денсаулыққа әсерін бағалау (EHIA); адам биомониторингін (HBM) дамыту; халықпен қауіп-қатер коммуникациясын күшейту; мамандарды оқыту; «Біртұтас денсаулық» қағидатын ілгерілету.

«Атырау облысы үшін экология мен денсаулық — күн тәртібіндегі өте өзекті мәселе. ДДҰ-мен бірге жасалған Жол картасы деректерге сүйеніп шешім қабылдауға мүмкіндік береді және өңірдің нақты нәтижелерге қол жеткізуін қамтамасыз етеді», — деді облыс әкімінің орынбасары Жасұлан Бисембиев.

Меморандум төрт жыл мерзімге жасалды және қажет болған жағдайда ұзартылуы мүмкін. Қол қою рәсімі 22–24 сәуір аралығында Астанада өтіп жатқан Өңірлік экологиялық саммит барысында өтті.

Форумға Орталық Азия елдерінің басшылары мен халықаралық ұйымдардың өкілдері қатысып, климат пен экология мәселелерін талқылауда.

Бүгін, 17:50