Экономист Қазақстанды шағын бизнес үшін салық жұмағы деп атады

Экономист әрі Ұлттық банк төрағасының бұрынғы кеңесшісі Айдархан Құсайынов Қазақстан мен Өзбекстандағы кәсіпкерлікке арналған салық жүйелерін салыстырып, Қазақстандағы жағдайдың анағұрлым қолайлы екенін айтты.

Сарапшы бұл пікірін Өзбекстандағы салық заңнамасындағы өзгерістерді талдағаннан кейін әлеуметтік желідегі парақшасында жариялады.

Айдархан Құсайыновтың айтуынша, Қазақстандағы салық саясатына қатысты сын-пікірлер көп болғанымен, ел шағын және орта бизнес үшін аймақтағы ең либералды мемлекеттердің бірі болып қала береді.

«Салық мөлшерлемелері төмен, төлемдер жылдамырақ әрі тиімдірек жүзеге асады, әкімшілік қысым да әлдеқайда аз», – деп жазды экономист.

Оның мәліметінше, Өзбекстанда шағын бизнес үшін қолданылатын жеңілдетілген ҚҚС іс жүзінде айналымнан алынатын 6 пайыздық салыққа тең. Ал Қазақстанда оған ұқсас режим бойынша мөлшерлеме 4 пайызды құрайды және өңірлік деңгейде 2 пайызға дейін төмендетілуі мүмкін.

Сарапшы қосылған құн салығы бойынша есепке қою шегіндегі айырмашылыққа да назар аударды. Оның айтуынша, Өзбекстанда бұл көрсеткіш шамамен 200 млн теңге болса, Қазақстанда 2,5 млрд теңгеге дейін жетеді.

Сонымен қатар Айдархан Құсайынов цифрландыру, салық төлеу рәсімдері мен әкімшілендіру деңгейі жағынан Қазақстанның көрші елден айтарлықтай алда екенін атап өтті.

Экономистің пікірінше, салықтық жүктеме тұрғысынан Қазақстан Орталық Азия мен ТМД кеңістігіндегі ең қолайлы елдердің бірі саналады. Алайда ол экономиканың дамуы тек салық саясатымен шектелмейтінін, өндірістік сектордың тиімділігі мен бәсекеге қабілеттілігі де маңызды рөл атқаратынын айтты.