Елде ақауы бар ақылы жол учаскесінде жүру тегін болады

Жаңа ереже 15 қыркүйектен бастап енгізілді. Мәселен, егер ақылы жолдың жалпы ұзындығы 100 шақырым болса, оның 5 шақырымында құрылыс жүріп жатса, онда тек 95 шақырымға ақша алынады. «ҚазАвтоЖол» Ұлттық компаниясы жолдардың жағдайын үнемі бақылауда ұстамақ. Бұл ретте әр жолаушы автобандарда қандайда бір кемшілікті байқаса, 14-03 нөміріне хабарлай алады. Жаңа тәртіп республикалық және халықаралық маңызы бар барлық ақылы жолдарға қолданылады.

Ғабит Шымырбаев, ҚР Көлік министрлігі Автомобиль жолдары комитенінің басқарма басшысы:

- Бұл енгізіп жатқан толықтырулар күнделікті жүргізушілер тарапынан наразылықтар тудырмау үшін жасалды. Жөндеу жұмыстары жүріп жатқан жолдарға неге мен ақы төлеу керекпін деген мәселелерді шешеді. Ақылы жолдарды неге енгізіп жатырмыз, қазіргі бюджеттің ақшасын үнемдеу үшін. Жаңа жолдар өздерін күтіп ұстау үшін осы ақылы жолдарды енгіземіз.