Елде өз өмірін сақтандыратын азаматтардың саны 25 пайызға артқан

Елде өз өмірін сақтандыратын азаматтардың саны 25 пайызға артқан. Сала сарапшылары: «Оң динамикаға тұрғындардың қаржылай сауаттылығының артуы себеп», - дейді. Одан өзге түрлі мемлекеттік ынталандырулар, компаниялар арасындағы бәсекелестік те халықтың белсенділігіне әсер етіп отыр. Жалпы алғанда бұл сақтық шаралары не үшін керек? 

Сақтандыру саласының активтері биылғы 9 айда 2,1 трлн теңгеге жеткен. Қазір Қазақстанда бұл нарық бойынша ресми 10 компания тіркеуде тұр. Оның 9-ы — жекеменшік. Айырмашылық тек бағаларында ғана. Дегенмен елде ерікті түрде жүзеге асатын өмірлік сақтандыру саласы әлі де кенжелеп тұр. Бұны мамандар айтып отыр. 

Айгүл Қизатова, «Мемлекеттік аннуитеттік компания» өмірді сақтандыру компаниясы» АҚ корпоративтік сату департаментінің бас маманы:

- Төлемдер 50 доллардан басталады. Әрі қарай адам өз еркімен таңдайды. Төлемді бір рет төлеуге болады. Ай сайын төлеуге болады. Тоқсандық, жарты жыл, бір жыл төлеуге болады. 

Сақтандыру секторы көпке түсініксіз тақырыптың бірі. Содан болар, өз өмірін сақтандырған 6,5 млн қазақстандықтың тек 1,5% ғана өз еркімен жасаған екен. Сарапшылар бұл жүйені өзіңізге және жақындарыңызға деген жауапкершілік деп түсіндіреді. Әрі қысылтаяң сәтте қаржылай қолдау көрсететін тетік. Жүйе салымшының қаржылық қауіпсіздігін қамтамасыз етіп, күтпеген жағдайларда ауыртпалықты жеңілдетуге мүмкіндік береді.

Марина Орынбаева, сақтандыру саласының сарапшысы:
- Мысалы, бір отбасы асыраушысынан айырылды. Оның атында дүниеден бөлек несиелер бар. Егер сол кісінің атында сақтандыруы болса, бұл несиелердің бәрін сол сақтандыру компаниясы жауып беретін еді. Ал сақтандыру полисі болмаса, онда бұның бәрі мұрагерлікке өтіп, одан қалған ұрпағы төлеп жауып жататын болады.

Сақтандыру секторы түрлі бағытқа бөлінеді. Салымшының жазатайым жағдайдан немесе белгілі бір себеппен бақилық болғанда төленетін төлем. Мүгедектік, ауру-сырқау, еңбекке уақытша жарамсыз болу. Соңғысы — келісімшарт мерзімі аяқталғаннан кейін берілетін қаржы. 

Динара Ыдырысова, сақтандыру компаниясының маманы:
- Бір ғана мысал келтірейін. Клиентіміз үш ай бойы 10 мың теңгеден төлеп отырды. Жол апатына ұшырады. Жұмыс орнынан денсаулық жағдайына байланысты төлем төленді және біздің сақтандыру компаниясы жарақаты үшін ақша төледі. Үш айда 30 мың теңге төлесе де, 700 мың теңгедей ақша алды.

Дей тұрғанмен сақтандыру секторы ақша салдым, табысқа кенелдім деген сөз емес. Компанияның төлем төлеуден бас тартатын кездері де болады. Егер сіз ай сайынғы төлемді 30 күннен кешіктірсеңіз, компания бір ай көлемінде қаржылай қолдау көрсетпейді. Сондықтан келісімшартта көрсетілген әр тармақтың орындалуы маңызды.