Елімай футбол клубы жаңа маусымға дайындығын таныстырды

Айтулы жиынға Абай облысы әкімінің орынбасары Мейірлан Раханов, «Елімай» ФК басқарма төрағасы Асқар Ұранхаев, KAZ Minerals Тобы басқарма төрағасының орынбасары Эльдар Мамедов, футбол ардагерлері мен жанкүйерлер қатысты.

Команданың бас бапкері Андрей Карпович клубтың жаңартылған құрамын таныстырып, алдағы маусымға қатысты сұрақтарға жауап берді. Сонымен қатар ол Абай облысының әкімі Берік Уәлиге және KAZ Minerals компаниясына алғысын білдірді.

«Аталған компания клубтың серіктесі ретінде компания жұмыс істейтін өңірлерде спорт пен әлеуметтік бастамаларды жүйелі түрде қолдап келеді. «Елімай» ФК-мен серіктестік футбол инфрақұрылымын дамытуға, жас спортшыларды қолдауға және салауатты өмір салтын насихаттауға бағытталған», деді бас бапкер.

Іс-шара барысында жасөспірімдер және балалар футболын дамытуға ерекше назар аударылды. Ұйымдастырушылар «Елімай» футбол орталығы Абай облысының жаңа буын спортшыларын тәрбиелейтін маңызды алаңға айналып келе жатқанын атап өтті. Бүгінде клуб тек спорттық жоба ғана емес, сонымен қатар өңірдің қоғамдық және мәдени өмірінің бір бөлігіне айналды.

«Елімай» ФК-ның жаңартылған құрамының таныстырылымы – Абай облысы үшін жаңа футбол дәуірінің басталғанын шынайы сезінетін ерекше сәт. Бүгінде клубтың айналасында айрықша энергия, үлкен үміт және жанкүйерлердің шынайы қызығушылығы қалыптасып отыр. Бұл заңдылық. Өйткені биыл «Елімай» мүлде жаңа деңгейге көтеріліп келеді – Премьер-лиганың фавориттерінің бірі әрі Конференция лигасының іріктеу кезеңіне қатысушы клуб ретінде. Біз үшін бұл жай ғана клубты қолдау емес. Бүгінде KAZ Minerals «Елімайды» стратегиялық серіктес ретінде қолдап қана қоймай, клубты дамыту мен басқару процестеріне де белсенді қатысып отыр. Мақсатымыз – ұзақ мерзімді әрі тұрақты футбол жобасын бірге қалыптастыру. Бұл адамдарды біріктіретін, балаларға шабыт беретін және өңірге мақтаныш сыйлайтын ауқымды жұмыс», деді Эльдар Мамедов.

KAZ Minerals Тобы басқарма төрағасының орынбасары және стратегиялық жобалар жөніндегі директорының айтуынша, алда  жаңа академиялар ашылып, балалар секциялары көбейеді, ал жасөспірімдерде бір күні «Елімай» сапында алаңға шығу арманы пайда болады.

«Командаға жарқын маусым, әдемі ойын, мінез және үлкен жеңістер тілейміз. Ең бастысы – футболды шынайы тірі ететін жанкүйерлермен байланысты жоғалтпау. Біз осы тарихтың бір бөлігі болғанымызға қуаныштымыз және бүкіл облыспен бірге жаңа матчтар мен жаңа эмоцияларды күтеміз», деді ол.

Расында «Елімай» ФК клуб айналасына өңірдің әр буын өкілдерін біріктіріп, жанкүйерлермен байланысты нығайтуды және Семей футболының жаңа тарихын жазуды жалғастырып келеді.