Еліміз сағатына 123,1 млрд кВт электр қуатын өндіреді

Елде көмір генерациясын дамыту жөніндегі ұлттық жоба әзірленеді. Оны Энергетика министрлігі мүдделі мемлекеттік органдармен бірлесіп дайындайды.

Бүгін Үкімет отырысында Премьер-министр Олжас Бектенов ведомство басшысы Ерлан Ақкенженовке осыны тапсырды. Сонымен қатар жиында Мемлекет басшысының Ұлттық құрылтайда көтерген мәселелерінің орындалу барысы пысықталды.

Еліміз сағатына 123,1 млрд килловат электр қуатын өндіреді. Бірақ бұл барлық жоспарды табысты орындауға жеткіліксіз. Атом стансаларының құрылысы аяқталғанын күтпей-ақ жаңа қуат көздерін іске қосуды қолға алуымыз керек. Осылай деген Мемлекет басшысы кешегі құрылтайда саладағы олқылықтарды тізді. Дегемен Үкімет көп кідірмей, түйткілді шешіп, тапсырмаларды орындауға білек сыбана кірісіп кетті.

Олжас Бектенов, ҚР Премьер-министрі:

- Мемлекет басшысы көмір генерациясын дамытудың және жаңа ЖЭО жобаларын іске асырудың маңызын атап өтті. Осыған байланысты Самұрық-Қазына қорына қаңтар айының соңына дейін Көкшетау, Семей және Өскемен қалаларында Жылу электр орталықтарын салу жобаларын іске асыру бойынша келісімшарттарды бекітуді тапсырамын. Құрылыс жұмыстарына алдымыздағы сәуір айында кірісу керек. Екінші ГРЭС-ті кеңейту бойынша құрылыс барысын ерекше бақылауға алу қажет. Сондай-ақ биыл Курчатовтағы ЖЭО және Екібастұздағы үшінші ГРЭС жобаларының техникалық құжаттамасын дайындауды аяқтау керек.

Негізі еліміздің 33 млрд тоннаға жуықтайтын ауқымды көмір қоры бар. Жыл сайын 110 млн тоннадан астам көмір өндіріледі. Жұмыс осы қарқынмен жалғасса, ол 300 жылға жетеді. Қазірдің өзінде Қазақстан осы бағыт бойынша әлемде алдыңғы қатарда. Демек көмір – мемлекетіміздің стратегиялық активі. Бұл тұста Энергетика министрілігі мүдделі органдармен бірігіп, 1 айдың ішінде Көмір генерациясын дамыту жөніндегі ұлттық жобаны әзірлеуге тиіс. Жоба электр энергиясын өндіруге де септігін тигізеді.

Ерлан Ақкенженов, ҚР Энергетика министрі:

- Бұл жоспарға шамамен 7,6  ГВт көмір генерациялау жобалары енгізілетін болады. Экологиялық заңнама талаптарын сақтай отырып, «таза көмір» технологиялар негізіндегі жаңа көмір генерациясының жобаларына ерекше назар аударылатын болады. Жалпы қуаты 960 МВт болатын Көкшетау, Семей және Өскемен қалаларындағы 3 жылу электр орталықтары жобаларының аяқталу мерзімдері өзгермейді және олардың іске асырылуы министрліктің толық бақылауында. Әрбір жоба көмір генерациясын дамыту жөніндегі әзірленіп жатқан Ұлттық жобада егжей-тегжейлі сипатталатын және тіркелетін болады.

Үкімет отырысында Премьер-министрдің орынбасары-Ұлттық экономика министрі де Президент пәрменінің атқарылу барысын баяндады. Серік Жұманғариннің сөзіне сүйенсек, негізгі басымдық халықтың әл-ауқатын арттыруға беріледі. Биыл азаматтардың нақты табысының артуы 2-3 пайыздан жоғары болуға тиіс, - деді. Ал бұл мақсатқа  экономиканың тұрақты әрі сапалы өсуін қамтамасыз ету және инфляцияны төмендету есебінен қол жеткізілмек.

Серік Жұманғарин, ҚР Премьер-министрінің орынбасары –  ұлттық экономика министрі:

- Инфляцияны 9-11%-ға дейін төмендету үшін шаралар қабылданады. Азық-түлік тауарларының отандық өндірісін ұлғайтуға және ішкі нарықты молықтыруға, тауар нарықтарында теңгерімсіздіктерді болдырмауға, өнімді тиімді сақтау және тасымалдау бойынша инфрақұрылымды дамытуға баса назар аударылатын болады. Осы жылдан бастап әлеуметтік маңызы бар азық-түлік тауарларының тізбесі 19-дан 31-ге дейін кеңейтілді. Табиғи монополиялар субъектілерінің қызметтеріне тарифтердің өсуінен инфляцияға әсер инфляцияның нысаналы параметрлеріне байланысты шектелетін болады.

Ел экономикасының тұрақты дамуының маңызды факторы - шағын және орта бизнес екені мәлім. Бұл тұста әкімшілік жүктемені азайтып әрі қолдау көрсете отырып, бизнесті жүргізу жағдайларын жақсарту бойынша жүйелі шараларды одан әрі жалғастыру көзделіп отыр.

Авторлары: Альмира Оразбай, Марат Диханбаев