Қырғызстан электр қуатын үнемдеуге көшті

Қырғызстанда электр қуатының тапшылығынан елдегі барлық майнинг фермалар көктемге дейін толық ажыратылды. Билік бұл қадамды халықты жарықпен үздіксіз қамтамасыз ету үшін қажет деп түсіндірді. Ал энергетика саласының мамандары таяу айларда жағдайдың одан әрі қиындауы мүмкін екенін ескертеді. 

Қырғызстан билігі жарықты үнемдеу мақсатында ел аумағындағы 31 майнинг ферманың жұмысына тыйым салды. Бұған қыста электр тұтынудың күрт артуы және энергия тапшылығының күшею қаупі себеп болып отыр. Сала мамандары алдағы айларда электр тұтыну бірнеше есеге артатынын ескерткен. 

Камчыбек Ташиев, Қырғызстанның мемлекеттік ұлттық қауіпсіздік комитетінің төрағасы:

- Наурыз айына дейін елдегі барлық майнинг фермаларының жұмысы толығымен тоқтайды. Егер біреу оларды заңсыз түрде қайта қосуға әрекет етсе, қатаң шаралар қолданылады.

Энергетиктердің айтуынша, электр тапшылығы Токтогұл су қоймасындағы су деңгейінің төмендеуінен болып отыр. Қазір қоймадағы су көлемі өткен жылмен салыстырғанда екі миллиард текше метрге аз. Бұл ұзаққа созылған қуаңшылық  салдары. Қырғызстан биыл да Ресей мен Түрікменстаннан қосымша электр энергиясын сатып алуға мәжбүр. 

Камчыбек Ташиев, Қырғызстанның мемлекеттік ұлттық қауіпсіздік комитетінің төрағасы:

- Кейбір министрліктерде салқындатқыштар тіпті түнде де жұмыс істейді. Бұл электр энергиясының шамадан тыс жұмсалуына әкеледі. Мамандар бұл мәселеге қатаң бақылау орнатуы керек.

Алдағы қыста барлық мемлекеттік мекемелерге түнгі уақытта жарықты толық өшіру міндеттелді. Сондай-ақ мектептерде кешкі жетіден кейін электр жарығын шектеу тапсырылды. Мейрамханалар мен ойын-сауық орындарына іс-шараларды тек сағат 22:00-ге дейін өткізу ұсынылды. Билік бұл қадамдар елді энергетикалық дағдарыстан шығару үшін қажет екенін айтады.

Авторлары: Динара Орынтай, Бакыт Чермашев