Өзбекстан қуат көзін үнемдеуге көшті

Биыл шілдеде Өзбекстан энергия тұтыну бойынша бұрын соңды болмаған көрсеткішке тап болды.

Аптап ыстықтан ала шапанды ағайын 272,6 млн кВт/сағат қуат көзін пайдаланған. Бұл қыс мезгілінде тұтынатын энергиядан да көп. Өзбекстан қуат көзін үнемдеу үшін енді жарықты өшіріп тұруға көшкен. Бұл үшін тұрғындарға алдын ала ескерту смс хаттары жіберіледі.

Өзбекстанда 2035 жылға қарай электр энергияға деген сұраныс 123 млрд КВт/ сағатқа дейін жетеді-деген болжам бар. Халық санының өсуіне байланысты тұрмыстық техниканы пайдаланушылар көбейе береді. Және оның тұтыну үлесі 10 млрд КВт сағат болмақ. Осыған байланысты Өзбекстан қуат көзін өндірудің барлық түрін қарастырып жатыр. Әлбетте туындаған мәселе де жоқ емес.

Санжар Сарипов, «Жасыл энергия» даму қорының атқарушы директоры:

- Жасыл энергияны дамытуда кездесетін ең үлкен мәселе ол мезгілдік тұрақсыздық. Мысалы күн сәулесінен қуат тек күндіз алынады. Ал түнде оны пайдаланамыз. Күн бұлтты болса, тағы қиын. Сол сияқты желден алынатын энергия, жел тұрмаса, қуат өндірмейді. Меніңше бұл мәселеге ғылыми тұрғыда қарау керек.

Соңғы жылдары Өзбекстанда электр көліктер көбейіп кетті. Бұл да энергияға қосымша салмақ салатыны анық. Сарапшылардың болжауынша, 2035 жылға қарай электр мобильдерге 5,5 млрд КВт-сағат энергия қажет болады. 

Аюбхон Мұсырмонқұлов, «Өзбекэнерго» компаниясының өкілі:

- Біз қазір гидроэлектрстанциялардың қуатын арттырып жатырмыз. Себебі энегрияға сұраныс жыл санап өсіп жатыр. 2030 жылға дейін 4 нысанды пайдалануға бермекпіз. Энергия үнемдеу бойынша тұрғындарға түсіндіру жұмыстарын өткіземіз.

Иә, энегрия тапшылығы күн күрт суытқанда, яғни жылыту маусымы басталғанда сезіледі. Жарық өшіп, көшелер тас түнекке айналды. Ал биыл керісінше аптап ыстықта энергия тұтыну көрсеткіші өсіп, рекорд жаңарды. Егер ғалымдардың айтып жүрген климаттық жылынуы орнаса, елде энергетикаға деген сұраныс мезгіл таңдамай өсе береді.

Дулат Нуркин