Елімізде 13 600 ден астам жол ережесін бұзу дерегі анықталды

Автомобиль көлігі және көліктік бақылау комитеті әкімшілік полиция комитетімен бірге Бас көлік прокуратурасының ұйымдастыруымен еліміз бойынша ауқымды рейдтік іс-шара өткізді.

Басты мақсат — жолаушылардың қауіпсіздігін қамтамасыз ету және жол-көлік оқиғаларының алдын алу.

Акция нәтижесінде 13,6 мыңнан астам жол ережесін бұзу дерегі анықталды.

1 167 — жолаушылар мен жүкті тасымалдау ережелерін бұзу; 394 — жолаушылар мен жүкті заңсыз тасымалдау фактілері (көбіне такси жүргізушілері); 1 962 — техникалық байқаудан өтпеген немесе техникалық талаптарға сәйкес келмейтін көлік құралдары. 

Оң рульді көліктерді тексеруге (Toyota Alphard, Estima және т. б.) ерекше назар аударылды. 213 қарсы бағыттағы жолаққа шығу дерегі тіркелді. Сондай-ақ, такси жүргізушілерінің бір тәулікте 5–6 аралық рейс орындау жағдайлары жиі кездеседі. Бұл — еңбек және демалыс режимін бұзу болып саналады.

— Жүргізушінің шаршаған күйінде көлік басқаруы — мас күйде көлік жүргізумен тең қауіп тудырады, — деп атап өтті Автомобиль көлігі және көліктік бақылау комитетінің қызметкерлері.

268 жүргізуші көлікті мас күйінде басқарса, 2 506 жүргізуші көлік басқарған кезде ұялы телефонды қолданған.

Автомобиль көлігі және көліктік бақылау комитеті тасымалдаушыларды заң талаптарын қатаң сақтауға, көлік құралдарының техникалық жарамдылығы мен жолаушылардың қауіпсіздігін қамтамасыз етуге шақырады.

Профилактикалық шаралар жалғасын табады.

Айта кетейік, Оралда жол ережесін 25 рет бұзған 21 жастағы жүргізуші жалған нөмірмен жүрген.