Елімізде алғаш рет қазақ тілді мобильді ойын іске қосылды

Қазақ тілін жасанды интеллектің көмегімен үйренуге болады. Алғаш рет елімізде қазақ тілді мобильді ойын іске қосылды.  

Steppe Games деп аталатын балаларға арналған ойын алаңында тіл үйренумен қатар ұлттық ас-ауқаттың түрімен танысады. Демек, жеткіншектер ойнап жүріп, ұлттық құндылықтарды бойына сіңіре алады. 

Айнұр Қуатқызы, тілші:

- Қазақ баласы замана көшіне ілесіп-ақ келеді. Жасанды интеллекті күн санап дамығанда, балаларға да ойлы ойын қажет болды. Бұл олқылықтың да орны толды. Телефонға телмірген жеткіншек енді ақыл мен ойдың ойынына ілесе алады. Степ Геймс жобасы арқылы баланың қиялына қанат бітеді. Тіпті, бала смартфондағы қосымша арқылы бауырсақ пісіріп, ләңгі тебуді үйренеді. Міне, осы арқылы ұлттық құндылықтарды бойына сіңіреді дейді жоба әзірлеушілері. 

Мақпал Жұмабай, Ш. Шаяхметов атындағы «Тіл-қазына» ұлттық ғылыми-практикалық орталығының бас директоры:

- Біздің кейіпкерлеріміз барлық тапсырмаларды өзі орындауы керек. Яғни бірінші кезеңде ол садақ атуы крек. Егер садақ ата алмаса келесі кезеңге өте алмайды. Бұл арқылы біз ұлттық ойындарды үйретеміз. Бір кезеңде ол ұлттық тағамды мысалы бауырсақ қалай пісіріледі соны үйренеді. Сонымен қатар, асық атып, ләңгі тебеді. Оған қоса Бозоқ сияқты тарихи ескерткіштермен танысады. Бұл ойын тек қазақ тілін үйретумен шектелмейді ол салт-дәстүр, тарихи ескерткіштерді таныту, ұлттық сананы дамыту бағытында үлкен мүмкіндіктері бар жоба. 

Ұлттық жоба  - технология мен дәстүрдің үйлескен үлгісі. Жоба әзірлеушілер оған шамамен екі жылға жуық уақытын сарп еткен. Ойынды  IT  мамандармен қатар, лингвистер бірлесіп жасап шықты.  Steppe Games  - тек тіл үйрету құралы емес, дүниетанымды, ұлттық құндылықты танытатын жоба. Балалар ойнап отырып, қазақша сөздік қорын толықтырады. Мәселен, бүгінде әлемде 2 млрдтан астам адам смартфон арқылы ойын ойнайды. Оның әрбір төртіншісі бала. Заманауи зерттеулер осыны көрсетіп отыр. Ал балаларға  пайдалы контенттің көп болғаны абзал.

Динара Ринатқызы, ҚР Ғылым және жоғары білім вице-министрі:

- Жастар арасында жасанды интелектіге деген қызығушылықтың артқаны қуантады. ЖИ құралдарын басқаруды игеріп, арнайы курстан өткен студенттер көп. Осындай ынталы жастардың арқасында заманауи технология ілгерлей бермек. Балаларға тіл үйрететін ойынды да зерделі жастар жасап шығарды. Қазірде жасанды интелект арқылы ойынды жетілдіре түскіміз келеді. 

Ойындағы жоба кейіпкерлері Арман мен Айша замандастарына білім нәрін қазақ тілінде үйретеді. Ойын картасы Қазақстанның нақты географиялық бейнесіне негізделген. 

Мейіржан  Әуелханұлы, жасанды интеллект жөніндегі сарапшы:

- ЖИ ол бір қатып қалған, ескіден қалған дүние емес. Ол жаңа дүние. Яғни жасанды интеллект саласындағы стартаптар өте көп. Және осы стартаптарға біздің министрлік өте жақсы жағдай жасау керек деген ойдамын. ЖИ қазір бүкіл әлемде өте жоғары деңгейде дамып, экономиканың қозғаушы күшіне айналып отыр. 

Бүгінде цифрлық дәуірдің жетегіне ерген жұрттың талабы жоғары. Себебі қазір әлемде контент үшін бәсеке қызу. Біздің жастар да жасанды интеллектіге негізделген жобалардың сан түрін жасады. Мәселен, отандық ІТ мамандар жасанды интеллект көмегімен видео мен суреттің анимациясын жасайтын отандық платформа ойлап тапты. Хигсвилд Эй-Ай стартабы жақында 1 млрд АҚШ долларына бағаланды. Осылайша отандық өнім тұңғыш Unicorn деңгейіне жеткен. Бүгінде бұл платформаға  әлем бойынша сұраныс көбейген.

Айнұр Қуатқызы, Жарқын Өрден