Елорда қысқы маусымға толық дайын

Бұл туралы бүгін “Астана Тазалық” басшысы мәлімдеді.

Замир Сағыновтың айтуынша, қардың кенеттен қалың түсуі немесе ауа райының өзгеруі, қала тіршілігіне әсер етпес үшін 700-ге жуық жұмысшы мен 408 арнайы техника жұмысқа кірісуге әзір. Қажетті материал қоры да толық жасақталған. Қоймаларда 1 200 текше метрден астам құм, 4 400 тонна көктайғаққа қарсы қоспа және 1 000 тонна реагент сақтаулы. Сондай-ақ биыл жүргізушілердің жұмысын бақылау үшін жаңа цифрлық жүйе енгізілді. Электрондық жол парағы жүйесі, әр техниканың қай жерде жүргенін, бағыт- бағдарды, себілген реагент көлемін және жұмыстың басталу уақытын онлайн көрсетеді. Бұл жаңашылдық коммуналдық қызметтің ашықтығын арттырып, жұмыстың тұрақты әрі үздіксіз жүруіне мүмкіндік береді. Мұндай жүйе 393 арнайы техникаға орнатылған.

Замир Сағынов, “Астана Тазалық” ЖШС  бас директоры:

- Күнделікті медициналық тексеріс Med365 құралымен және өзіміздің қазақстандық өнім – Adal Check құралымен өтеді. Тікелей өткен бойында осы электронды парақшаға бірден түседі. Ол кісіні жұмысқа жіберуге бола ма, жалғастыруға бола ма – соны анықтауға көмектеседі.Содан кейін GPS-трекер дейміз ғой, бейнематериалдар арқылы да жүргізушіге көмек көрсетеді. Егер қай жерде шаршап, ұйқысы келіп отырған болса, міндетті түрде осында отырған диспетчерге хабарлама келеді және өзіне де ауызша хабарлама беріледі.