Елордада алғашқы кәсіпкер әйелдер слеті өтті

Елде кәсіптің 48%-ін әйелдер басқарады, деп хабарлайды 24KZ. Елордада кәсіптегі нәзік жандардың қатысуымен алғаш рет ұлттық слет өтті.

Елімізде шағын-орта бизнесті жүргізіп отырған 1 млн-нан аса қыз-келіншек бар. Бұл елдегі кәсіпкерлердің тең жартысы. Жиынға іскер әйелдерден бөлек, кәсібін енді бастағандар, қоғамдық ұйым жетекшілері және халықаралық серіктестер де қатысты. Онда әлеуетті арттыру, қаржыландыру жолын кеңейту және бизнесті цифрландыру мәселесі талқыланды. Сондай-ақ саясатқа араласуға ден қойғандарға жаңа мүмкіндіктер мен табысты кәсіпкерлердің тәжірибесі ұсынылды. «Ұлттық слет әйелдердің ел экономикасындағы рөлін күшейтіп, өңірлер арасындағы әріптестікті дамытуға септігін тигізеді», – дейді  ұйымдастырушылар.

Әсем Талғатқызы, кәсіпкер:

- Кәсіппен айналысқаныма, міне, 7 жылға жақындап қалды. Біздің лабораториялар 2020 жылы ашылды. Қазіргі Қазақстан бойынша дамып келе жатыр лабораториялар желісі. Компаниямда 100-ден аса қызметкер қызмет етеді. Бүгін осындай ұлттық слетті ұйымдастырып отырған «Атамекен» Ұлттық кәсіпкерлер палатасына алғысым шексіз. Кәсіпкерлердің басын жинап, бір-бірімен танысу бастамасы үшін, сонымен қатар бізге мотивация, қолдау көрсетіп жатқанына үлкен ризашылығымды білдіремін.