Елордадағы Сарыарқа ауданының тұрғындары көгілдір отынның игілігін көреді

Елордадағы Сарыарқа ауданының тұрғындары көгілдір отынның игілігін көреді.

Бүгін тағы 90-ға жуық үйге табиғи газ жетті. Абоненттердің басым бөлігі алдынғы жоспарға енбей қалғандар. Енді міне, мәселе шешімін тауып, көптен күткен армандары орындалды. Қарашаның қуанышына біздің түсірілім тобы да ортақтасып қайтты.

Астананың бұл ауданына табиғи газ жеткеніне бірнеше жылдың жүзі болды. Алайда кейбір тұрғын - жай негізгі жоспарға енбей қалған еді. Көгілдір отынға қолы жетпей отырған көптің тілеуін "QazaqGaz Aimaq" мамандары орындап берді. Бүгінгі жұманың берекелі таңында 90-нан аса үй көмір тасып, от жағу машақатынан құтылды.

Дарима Жеңісханқызы, қала тұрғыны:

- Бүгін міне газ келіп жатыр үйімізге. Бұл енді керемет сезім. Астана қаласының әкіміне, энергетика министрлігіне алғысымызды айтамыз. Үлкен жобаны дайындап қаншама үйді газ құбырына қосты. 

Қазір Сарыарқа ауданында мұндай тоқсанға жуық отбасы бар. Олардың үйін табиғи газға қосу үшін 3500 шақырымға жуық газ құбыры тартылды. Тұрғындар игілігіне бағытталған шаруа "Qazaqgaz Aimaq" жергілікті өндірістік филиалының инвестициялық бағдарламасы аясында жүргізілген.

Ержан Балабеков, "QazaqGazAimaq" АҚ Астана өндірістік филиалының бас инженері:

- 300-ге жуық абонент табиғи газға қосылды. 3500 шақырымға жуық газ құбыры салынды. Және 2 газ реттегіш пункттері қойылды. Жалпы жұмыс аудандық әкімшілік және энергетика басқармасымен бірлесіп орындалған. Халықтың ұсынысы-өтініші бойынша жасалды. Бүгінгі таңда ұсыныстар тіркеліп сол бойынша атқарылды.

Сарыарқа ауданында бүгінде 5000-ға жуық адам көгілдір отын тұтынады. Көрсеткіш 100 пайызға жетті. Жалпы бас қалада бүгінде 800 шақырымдық газ құбыр тартылған.

Кәмшат Мұхамеджан