Енді әр қазақтың шотын салық органдары тексереді: Не нәрсені ескеру керек?

Ұлттық банк жеке тұлғалардың банктік шоттары қандай жағдайда салық органдары тарапынан тексерілетінін түсіндірді, деп хабарлайды Arasha.kz.

Ұлттық банк төрағасының орынбасары Берік Шолпанқұловтың айтуынша, бұл өзгерістер тіркелмеген кәсіпкерлік қызметті анықтауға бағытталған. Ол бұл туралы “Банктер және банктік қызмет туралы” заң жобасын талқылау барысында мәлімдеді.

Шолпанқұлов БАҚ-та тараған “Қазақстанда банктік құпия жойылады” деген ақпараттың шындыққа жанаспайтынын атап өтті.
«Банктік құпия жойылмайды. Салық кодексіне өзгерістер енгізілген кезде жеке тұлғалардың деректері туралы көп талқыланды. Мемлекеттік кірістер комитеті жеке кәсіпкер немесе ЖШС ретінде тіркелмеген азаматтардың жасырын кәсіпкерлік қызметін анықтау үшін баламалы тетік ұсынды», – деді ол.

Ұлттық банктің түсіндіруінше, салық органдары азаматтардың банк шоттары туралы мәліметті тек екі жағдайда ғана сұрата алады:

егер жеке тұлғаның шотына әртүрлі жіберушілерден 100-ден астам ақша аударымы түссе;

егер шоттағы ақша айналымы 2 миллион теңгеден асып кетсе.

«Осы екі жағдайдың бірі тіркелмесе, азаматтар туралы ешқандай ақпарат салық органдарына берілмейді», – деп нақтылады Берік Шолпанқұлов.