Енді біз олардың есімдерін атаймыз Қазақстанда интернет треш стримерлерден тазартылып жатыр

Бірнеше қазақстандық стример үшін өзгелердің жан ауруынан "хайп" жасау, адам ұрлау және электршокермен пранк ұйымдастыру әрекеттері айыппұл және қамауға алумен аяқталды. Бұл туралы ІІМ баспасөз қызметі хабарлады, деп жазады Tengri Life.

Ең ауыр жаза Шымкенттің 20 жастағы тұрғыны Данияр Сейдалиевке тағайындалды. Ведомство мәліметінше, ол тікелей эфир кезінде көрермендерді алдап, электршокер қолдану арқылы адам ұрлау көрінісін сахналаған. Трансляция балағат сөздермен және қоғамдық тәртіпті өрескел бұзумен қатар жүрген.

Сот оған сегіз тәулік әкімшілік қамауға алу жазасын тағайындады.

Тағы бір жағдай Жамбыл облысында тіркелді. 19 жастағы Жарқынай Байбек пен Асылжан Танаберганов стрим кезінде аудитория жинап, көбірек донат алу үшін бір-біріне әдейі соққы жасаған. Олар да әкімшілік жауапкершілікке тартылды.

Құқық қорғау органдарының назарына іліккендер қатарында TikTok-та "Бауырсақ" лақап атымен танымал Астананың 37 жастағы тұрғыны Индира Ештаева да бар. ІІМ ақпараты бойынша, ол тікелей эфирлерінде балағат сөздер айтып, әдепсіз контент таратқан. Ұсақ бұзақылық жасағаны үшін оған айыппұл салынды.

Ал Алматыда "Ақтөре" никнеймімен белгілі 32 жастағы контент жасаушы Ақтөре Батырбек бес тәулікке қамауға алынды. Ведомство мәліметінше, ол стрим кезінде айналасындағыларға тіл тигізіп, балағат сөздер сөйлеген.

Сондай-ақ TikTok-та "Алтын қыз" деген атпен танымал Жамбыл облысының тұрғыны Лайло Касымоваға айыппұл салынды. ІІМ оның эфирге бірнеше рет балағат сөздермен шығып, заңға қайшы контент жариялағанын мәлімдеді.

Министрлік дерегінше, барлығы тоғыз адам әкімшілік жауапкершілікке тартылған.

ІІМ мұндай трансляциялар танымалдылық пен қаралымнан табыс табу үшін жасалады деп санайды.

"Аталған азаматтар лайк, қаралым және донат үшін ештеңеден тайынбай, шектен шығып жатыр. TikTok-тағы тікелей эфирлерде балағат сөздер айтып, әдепсіз әрекеттер көрсетіп, қауіпті пранктер ұйымдастырып, адамдарды қорлайды", - деді ІІМ ресми өкілі Шыңғыс Әлекешев.

Оның айтуынша, мұндай контентті балалар мен жасөспірімдердің тұрақты тамашалайтыны ерекше алаңдаушылық тудырады.

Ведомство интернеттегі анонимділік жауапкершіліктен құтқармайтынын атап өтті.

"Анонимді аккаунттың немесе телефон экранының ар жағында жасырынып қаламын деп ойламаңыздар. Ішкі істер министрлігінде кез келген құқық бұзушының жеке басын анықтауға мүмкіндік беретін барлық қажетті құрал бар. Осындай әрбір құқық бұзушылық анықталады. Әрбір құқық бұзушы заңға сәйкес жауапқа тартылады. Алдағы уақытта да құқық бұзушылардың есімдерін тек алдын алу және профилактикалық мақсатта жариялап, көрсететін боламыз", - деді Әлекешев.

Ол ІІМ мұндай заңбұзушылықтарды анықтауды және олардың авторларын жауапқа тартуды жалғастыратынын айтты. Министрлік өкілінің сөзінше, полиция әлеуметтік желілердегі заңсыз контентке шағымданған қолданушылардың өтініштерін де қарастырып жатыр.

Тағы оқыңыз: Алматылық танымал блогерлер жолдағы “шоу“ үшін жазаланады

Google News арқылы жаңалықтарымызды қадағалаңыз