Есіктен есікке акциясы: Әділет өңірлерде халықтың ұсынысын жинап жатыр

Акция еліміздің барлық өңірінде өтіп, тұрғындарды партияның «Әділетті болашақ үшін» сайлауалды бағдарламасының негізгі бағыттарымен таныстыруға, сондай-ақ қазақстандықтардың ұсыныстары мен өтініштерін жинауды көздейді, – деп хабарлайды Aikyn.kz.

«Есіктен есікке» жобасы аясында өңірлік сайлауалды штабтардың өкілдері, Құрылтай депутаттығына кандидаттар, партияның сенімді тұлғалары, белсенділер мен жастар қанатының өкілдері қала және ауыл тұрғындарымен мекенжай бойынша кездесулер өткізу үстінде. Кездесу барысында азаматтар партияның негізгі бастамаларымен танысып, сұрақтарына жауап алып, сонымен қатар, елдімекендердегі өзекті мәселелер талқыланып келеді.

Партияның мәліметінше, мұндай кездесулер ірі қалаларда ғана емес, аудан орталықтары мен шалғай ауылдық жерлерде де ұйымдастырылып жатыр.

Мәселен, Солтүстік Қазақстан облысында Құрылтай депутаттығына кандидат Қалия Төренова Петропавл қаласының тұрғындарымен кездесіп, сайлауалды бағдарламаның негізгі ережелерін таныстырды және облыс орталығын дамыту мәселелерін тұрғындармен бірге талқылады.

Жетісу облысында акция «Есіктен есікке: әр адамның пікірі маңызды» ұранымен өте бастаған. Өңірлік штаб өкілдері тұрғындарға түсіндіру жұмыстарын жүргізіп, партияның сайлауалды бағдарламасы туралы ақпараттық материалдар таратуды қолға алған. Осындай тынымсыз шаралар Қызылорда, Қостанай және Қарағанды облыстарында да ұйымдастырылып жатыр.

Жамбыл облысында акция аясында Құрылтай депутаттығына кандидат Шолпан Қариева көшпелі штаб мүшелерімен бірге Тараз қаласының тұрғындарымен, «Ауыл Береке» базарының кәсіпкерлерімен және Айтеке би тұрғын алабының тұрғындарымен кездесті.

«Партияның басты міндеті – азаматтармен тұрақты диалог орнатып, әрбір сайлаушының пікірін ескеру. Біз үшін сайлауалды бағдарламаны таныстыру ғана емес, әрбір адамның ойын тыңдау маңызды. Дәл осындай ашық диалог тиімді шешімдер қабылдауға және әділетті өзгерістерге қол жеткізуге мүмкіндік береді», – деді кандидат Шолпан Қариева.

Акция Шығыс Қазақстан, Батыс Қазақстан және Ақтөбе облыстарында да жалғасып жатыр. Бұл өңірлерде партия өкілдері тұрғындармен мекенжай бойынша кездесулер өткізіп, ақпараттық материалдар таратып, азаматтардың ұсыныс-пікірлеріне құлақ асып келеді.

«Партияның басым бағыттарының қатарында азаматтарды қолжетімді баспанамен қамтамасыз ету, медициналық көмектің сапасы мен қолжетімділігін арттыру, халықтың өмір сүру ұзақтығын ұлғайту, бір миллион жаңа жұмыс орнын құру, орта кәсіпкерлікті қолдау, ауылдық аумақтарды дамыту, елдің азық-түлік және энергетикалық қауіпсіздігін нығайту, сондай-ақ заманауи технологиялар мен жасанды интеллектке негізделген жаңа экономиканы қалыптастыру бар», – деп атап өтті Ақтөбе қаласының тұрғындарымен кездесуде Құрылтай депутаттығына кандидат Ербол Данагұлов.

Мұндай ақпараттық-түсіндіру акциялары Алматы, Астана және Шымкент қалаларында да қарқын алған. Өңірлік штабтың мәліметінше, Алматыда үгіт-насихат науқаны басталғалы бері «Есіктен есікке» форматында 64 шара ұйымдастырылып, олардың барысында 26 мыңнан астам тұрғынмен кездесу өткізілген.

Партия өкілдерінің айтуынша, «Есіктен есікке» жобасы сайлаушылармен тікелей байланыс орнатудың негізгі тетіктерінің бірі саналады. Кездесулер барысында түскен барлық ұсыныс пен өтініш партияның алдағы жұмысында ескерілмек.

Дайындаған:

«Әділет» партиясының баспасөз қызметі.

«Әділет» партиясы» ҚБ сайлау қорының қаражаты есебінен төленді.

Тапсырыс беруші: Н.Т. Мыңжасаров.