Еуроодақ елшілері әлемдегі жағдайды талқылау үшін Брюссельде жиналды

Еуропалық бұқаралық ақпарат құралдарының мәліметінше, биылғы конференция бұрын-соңды болмаған геосаяси тұрақсыздық жағдайында өтіп жатыр. Сондықтан алғашқы күннің негізгі тақырыптары Таяу Шығыс пен Украинадағы жағдай болды.

Ашылу күнінің басты оқиғасы Еуропалық комиссия президенті Урсула фон дер Ляйеннің бағдарламалық сөзі болды. Ол Еуроодақтың сыртқы саясатта Одақ мүддесіне негізделген неғұрлым қатаң бағытқа түбегейлі бет бұрғанын атап өтті.

— Біз енді өз мүдделерімізді қорғаудың жалғыз жолы ретінде «ережелерге негізделген» жүйеге ғана сүйене алмаймыз. Қауіпсіздік еуропалық дипломатияның негізгі қағидасына айналуы тиіс — қорғаныс, деректер, өнеркәсіп пен сауда салаларының барлығында, — деді фон дер Ляйен.

Еурокомиссия басшысы Еуроодақтың қорғанысқа жұмсайтын шығыны 2030 жылға қарай 800 млрд еуроға дейін жететінін айтты. Оның сөзінше, соғыстан кейінгі тұрақтылық кезеңінде құрылған институттар қазіргі әлемдегі өзгерістер қарқынына сай келмейді. Ол Еуропаны «стратегиялық тұрғыдан серпіліс жасауға» шақырып, одақты бейбіт жоба ғана емес, қуатты геосаяси ойыншыға айналдыру қажеттігін айтты.

Конференция апта соңына дейін жалғасады. Ертең, 10 наурызда, елшілер алдында Еуропалық кеңес президенті Антониу Кошта сөз сөйлейді. Оның баяндамасында Еуроодақты кеңейту стратегиясы мен одаққа кандидат елдермен қарым-қатынас мәселелері қаралады деп күтіліп отыр. Сонымен қатар Исландияда өтуі мүмкін референдум мәселесі де талқылануы мүмкін.