ФИДЕ екінші инклюзивті шахмат олимпиадасын ашты

Мемлекеттік кеңесші Ерлан Қарин ФИДЕ-нің шахматтан мүмкіндігі шектеулі жандар арасындағы екінші Олимпиадасының ашылу рәсіміне қатысты.

Сондай-ақ Олимпиаданың ашылуында Халықаралық шахмат федерациясының президенті Аркадий Дворкович және Қазақстан шахмат федерациясының президенті Тимур Турлов болды. Мемлекеттік кеңесші Қазақстан Президенті Қасым-Жомарт Тоқаевтың Олимпиада қатысушыларына арнаған құттықтау сөзін оқып берді. Мемлекет басшысының сөзінде Қазақстанның инклюзивтілік қағидаты негізінде шахматты жан-жақты дамытуға белсенді түрде үлес қосып келе жатқаны айтылған. Сондай-ақ бұл Олимпиада – мемлекетіміздің шахматқа деген ерекше көзқарасының ғана емес, сондай-ақ Әділетті Қазақстан тұжырымдамасымен сәйкес келетін тең мүмкіндіктер қағидатын ілгерілетуге деген берік ұстанымының да нақты көрінісі. Өз сөзінде Ерлан Қарин мемлекет әлеуметтік саясат аясында азаматтардың барлығына тең жағдай жасауға айрықша мән беретінін атап өтті. Мүмкіндігі шектеулі және ерекше білім алу қажеттілігі бар адамдар үшін жүйелі әрі кешенді шаралар қабылданып жатыр. Қазанның 20-26 күндері Астанада өтетін Олимпиадада әлемнің 29 елінен 34 команда бақ сынайды.