Мемлекет басшысы Астанада жасанды интеллект бойынша IOAI 2026 халықаралық олимпиадасын ашты. Жарыс қолдауымен өтуде

Олимпиада Қазақстан Республикасы Президентінің және UNESCO патронаждығымен өтуде. Жарысты Қазақстанның спорттық бағдарламалау федерациясы ұйымдастырды. Олимпиаданың бас серіктесі қазақстандық Kaspi.kz технологиялық компаниясы.

IOAI-2026 ашылу салтанатында Қазақстан Республикасының Президенті Қасым-Жомарт Тоқаев сапалы білім мен дарынды жастарды қолдаудың ерекше маңызын атап өтті.

«Біз жоғары сапалы білімге, дарынды балаларды жан-жақты қолдауға баса назар аударамыз.

Былтыр Бейжіңде өткен Жасанды интеллект бойынша олимпиададан Қазақстан оқушылары үш алтын, бір күміс және үш қола медаль жеңіп алды. Ел мерейін асыратын бұл жетістік жастарымыздың зияткерлік және шығармашылық әлеуетінің зор екенін көрсетеді.

Сіздердің білімдеріңіз бен идеяларыңыз болашақта медицина, білім беру, қоршаған ортаны қорғау және адам өмірі үшін аса маңызды басқа да салалардағы тың шешімдердің негізіне айналуы мүмкін.

Мүмкін дәл осы жерде, осы Олимпиадада әлемді жақсы жаққа өзгертетін жаңа идеялар мен жобалар дүниеге келер. Бұл Олимпиаданың шынайы құндылығы тек медаль жеңіп алуда ғана емес. Ең бастысы – бір-біріңізден үйрену, идея алмасу, жаңа достық орнату және болашақтағы сұраныстарға бірге жауап іздеу мүмкіндігі».

Kaspi.kz үшін IOAI-2026-ны қолдау – жас таланттарды дамытуға және Қазақстанның технологиялық болашағына қосылған үлес.

Kaspi.kz негізін қалаушылардың бірі әрі басшысы Михаил Ломтадзе Президентке білімді, дарынды жастарды және еліміздегі жасанды интеллекттің дамуын қолдағаны үшін алғысын білдірді.

«Ең алдымен Қазақстанда білімді, дарынды жастарды және жасанды интеллекттің дамуын қолдап отырғаны үшін Президент Қасым-Жомарт Кемелұлы Тоқаевқа алғысымды білдіремін.

Kaspi.kz үшін IOAI-2026 олимпиадасының бас серіктесі болу үлкен мәртебе. Жасанды интеллект бүгінде күрделі міндеттерді шеше алады. Бірақ адамның басты артықшылығы – оның құндылықтары, шын мәнінде маңызды міндеттерді таңдай білуі және өзі жасап жатқан дүниеге жауапкершілікпен қарауы.  

Kaspi.kz Қазақстанда жасалған. Оны әлемдік деңгейдегі технологияларды әлемнің кез келген жерінде жасауға болады деп сенетін команда құрды. Миллиондаған адам пайдаланатын өнім жасау үшін міндетті түрде Кремний алқабында дүниеге келудің қажеті жоқ.

Олимпиада қатысушыларына айтар кеңесім: әрдайым білімге құштар әрі қарапайым болыңыздар, ешқашан үйренуді тоқтатпаңыздар және адамдардың өмірін жақсартатын технологияларды жасаңыздар. Әлемге қуатты жасанды интеллект ғана емес, оны адамзат игілігі үшін жауапкершілікпен қолданатын адамдар да қажет».

IOAI-2026 олимпиадасының Астанада өтуі Қазақстанның әлемдік технологиялық қауымдастықтың маңызды бөлігіне айналып келе жатқанын және мұнда мықты инженерлер, зерттеушілер мен болашақ жаһандық технология жасаушылар өсіп келе жатқанын көрсетеді.

Қазақстан құрамасы әлемдегі ең үздік командалардың қатарына кіреді. Өткен жылы Бейжіңде өткен Жасанды интеллект бойынша халықаралық олимпиадада отандастарымыз жеті медаль: үш алтын, бір күміс және үш қола жүлдені жеңіп алды.

Апта бойы қатысушыларды жарыстар ғана емес, Қазақстанмен таныстыруға арналған мазмұнды мәдени бағдарлама күтеді. Олар Астананың басты көрікті жерлерін аралап, еліміздің мәдениеті мен дәстүрімен танысады, спорттық турнирлерге, Star Wars стиліндегі тақырыптық шоуға қатысады және Comic Con Astana фестиваліне барады.

Жасанды интеллект бойынша халықаралық IOAI-2026 олимпиадасының жеңімпаздарын марапаттау және жабылу салтанаты 7 тамыз күні Астанада өтеді.