Флоридадағы әуежайдың атауы Трамптың құрметіне өзгертілді

Флоридадағы Палм-Бич халықаралық әуежайы ресми түрде атауын өзгертті. Енді әуе айлағы АҚШ-тың қазіргі президенті Дональд Трамптың есімімен аталады, деп хабарлайды Tengri Travel.

Тиісті шешім 9 шілдеде күшіне енді. Елдің Көлік министрлігі жариялаған АҚШ Федералдық азаматтық авиация басқармасы (FAA) бұйрығына сәйкес, әуежайға жаңа ресми атау берілді.

Атауынан бөлек, әуежайдың үш әріптен тұратын коды да өзгерді. Бұрынғы PBI кодының орнына енді Дональд Джон Трамптың (Donald John Trump) бас әріптеріне негізделген DJT коды қолданылады.

Әуе айлағының таңдалуы кездейсоқ емес. Флоридада Дональд Трамптың Мар-а-Лаго резиденциясы орналасқан, онда ол уақытын жиі өткізіп қана қоймай, шетелдік көшбасшылар мен ресми делегацияларды қабылдайды.

Флорида билігі атауды өзгерту туралы бастаманы биыл ақпанда мақұлдаған болатын.

Наурызда штат губернаторы Рон Десантис тиісті жарлыққа қол қойды. Одан кейін АҚШ Федералдық азаматтық авиация басқармасының келісімін алу ғана қалған еді, ол енді ресми түрде күшіне енді.

Бұған дейін Палм-Бич әуежайы Дональд Трамптың құрметіне қайта аталатыны хабарланған болатын.

Тағы оқыңыз: Lufthansa кейбір жолаушыларға жаңа алым енгізді

Google News арқылы жаңалықтарымызды қадағалаңыз