Қырғызстанда Абай Құнанбайұлының құрметіне көше атауы берілді

Қырғызстанның оңтүстігіндегі ең ірі облыс орталығы - Ош қаласында Абай Құнанбайұлының құрметіне көше атауы берілді.

Сондай-ақ шаһарда қазақтың ұлы ақынына арналған ескерткіш бой көтерді. Салтанатты рәсімге Қазақстанның мәдениет және ақпарат министрі Аида Балаева қатысты.

Гүл шоғы, ұлттық тағамдар мен қырғыз әуендері. Қазақстанның мәдениет және ақпарат министрі Аида Балаеваны Ош қаласы ыстық ықыласпен қарсы алды. Бұл кейінгі бірнеше жылда осындай деңгейдегі қазақстандық мемлекеттік қызметкердің Қырғызстанның оңтүстігіне жасаған алғашқы сапары. Ош қаласында қазақ жазба әдебиетінің негізін қалаушы Абай Құнанбайұлының құрметіне көше атауы беріліп, ескерткіш бой көтерді. Жергілікті тұрғындар дән риза, көңіл-күйі көтеріңкі. Олар мұны “тарихи маңызы зор оқиға” деп атап өтті.

Талант Апыев, драма театрының режиссёрі:

- Әр халықтың біртуар перзенттері болады. Абай да дәл сондай, үздіктердің қатарында. Ағартушылық қызмет атқарып, ұлтқа рух берді. Әр қазақ одан үлгі алуы тиіс.

Абай Құнанбаевқа арналған ескерткіш көшенің басында орналасқан. Жаңа магистральдің ұзындығы шамамен төрт шақырымға дейін жетеді. Ош қаласы үшін бұл аз қашықтық емес. Мұнда жақында жөндеу жұмыстары аяқталып, асфальт төселген еді. Ал ұлы ойшылдың ескерткіші шағын саябақтың орта тұсында орналасқан. Бұл қала тұрғындары үшін тынығып, демалуға таптырмас жер. Сонымен қатар дәл осы аумақта Абай мұражайы бар. Онда ақынның шығармаларымен қатар заманауи қазақстандық әдебиет туындылары және Қазақстанның жетістіктері жайлы анықтамалар назарға ұсынылған.

Женишбек Токторбаев, Ош қаласының әкімі:

- Абай мұрасы оның шығармалары мен философиялық ойларымен шектелмейді. Ол күллі адамзатқа жасалған үндеу. Адал еңбек пен білімге үндеу. Ол жүрекке сенім мен үміт ұялатады. Ең алдымен адам болу деген ұлттық идеясы азаматтардың жүрегінен орын тауып, даму жолының негізгі бағытына айналды.

Ескерткіш пен көшенің салтанатты ашылу рәсімі мерекелік концертке ұласты. Ақынның өлеңдері оқылып, әндері шырқалды. Драма театрының әртістері ағартушы өмірінің үзінділерін қойылым арқылы көрсетті. Абай көшесінің қасиетті Сулайман-Тоо баурайынан бастау алуы ерекше символикалық мәнге ие. Бұл бауырлас елдердің достастығын одан әрі нығайтатыны анық. Шара барысынсда Ош қаласының әкімі Қазақстан Президенті Қасым-Жомарт Тоқаевтың Жарлығымен екінші дәрежелі “Достық” орденімен марапатталды. Мемлекеттік награданы министр Аида Балаева табыстады. Айта кету керек, жарты миллионға жуық халқы бар Ош қаласы Қырғызстанның оңтүстігіндегі ең ірі қала. Орта Азиядағы ең көне шаһарлардың бірі - Ош тарихында енді Абай Құнанбайұлы көшесі мен ескерткіші деген жаңа парақ ашылды.

Мөлдір Жақан, Бакыт Чермашев