Газа секторында бітім жарияланғаннан кейін 87 палестиналық қаза тапты

Палестиналық анклавтың Денсаулық сақтау министрлігінің деректері бойынша, бітім туралы келісім күшіне енген сәттен бері 311 адам әртүрлі деңгейдегі жарақат алған.

Соңғы тәулікте ғана медициналық мекемелерге 13 адамның мәйіті жеткізілген. Олардың жетеуі – Израиль әуе соққыларының салдарынан қаза тапқан, ал қалған алтауы – қираған ғимараттардың үйінділерінің астынан табылған.

Палестиналық тараптың мәліметінше, 2023 жылдың 7 қазанынан бастап жалпы қаза тапқандар саны 68 229 адамға жетіп, жараланғандар саны 170 мыңнан асқан.

Сонымен қатар Израиль тарапы палестиналықтарға 15 адамның денесін қайтарып берді. Жалпы, Халықаралық Қызыл Крест комитетінің араласуымен қол жеткізілген келісім аясында 165 адамның мәйіті қайтарылған.

6 қазанда Израиль мен ХАМАС делегациялары Египет, Катар, АҚШ және Түркия өкілдерінің делдалдығымен жанжалды реттеу бойынша жанама келіссөздерді қайта бастаған еді.

Ал 9 қазанда тараптар АҚШ-тың бұрынғы президенті Дональд Трамп ұсынған бейбіт жоспардың алғашқы кезеңін жүзеге асыру жөніндегі келісімге қол қойды. Бітім режимі 10 қазанда күшіне енді.

Еске сала кетсек, Израильдің шабуылынан Газада бір күнде 40-тан астам палестиналық қаза тапқанын жазғанбыз.

Ал кеше АҚШ вице-президенті Джей Ди Вэнс Газа секторындағы бітімді қолдау үшін Израильге барды.