Газада су тасымалдаушы көлік жүргізушілері қаза тапты: ЮНИСЕФ шұғыл тергеу жүргізуді талап етті

ЮНИСЕФ Газа секторына ауызсу тасып жүрген екі жүк көлігі жүргізушісінің Израиль әскерінің атқылауынан соң қаза табуына байланысты «қатты алаңдаушылық» білдірді. Ұйым бүгін жариялаған мәлімдемеде оқиға кеше таңертең солтүстік палестина анклавындағы Мансура ауданындағы су тарату нүктесінде болғаны айтылған.

Мәліметке сәйкес, зардап шеккендер су тасымалдау бойынша жоспарлы жұмыстарды «бағыттар мен рәсімдерге еш өзгеріс енгізбестен» орындап жүрген сәтте атқыланған. Шабуыл салдарынан тағы екі адам жараланған.

ЮНИСЕФ Мансурадағы бұл нүкте қазіргі уақытта «жұмыс істеп тұрған жалғыз» су құю орны екенін атап өтті. Ол «Мекорот» су құбырына қосылған автоцистерналарды қамтамасыз етеді және Газа қаласына су жеткізу үшін гуманитарлық ұйым қызметкерлері тәулігіне бірнеше рет пайдаланады. Бұл нысан жүздеген мың адамға, соның ішінде көптеген балаға су жеткізуде маңызды рөл атқарады.

Оқиғадан кейін ұйым мердігерлеріне қауіпсіздік жағдайы жақсарғанға дейін бұл аумақтағы қызметті тоқтату тапсырылды.

- Гуманитарлық қызметкерлер, өмірлік маңызы бар қызмет көрсетушілер және азаматтық инфрақұрылым, соның ішінде су жүйелері ешқашан нысанаға алынбауы тиіс, – деп мәлімдеді ЮНИСЕФ.

Ұйым Израиль билігін бұл оқиғаны «дереу тергеп», толық жауапкершілік қамтамасыз етуге шақырды. Сондай-ақ ЮНИСЕФ халықаралық гуманитарлық құқыққа сәйкес бейбіт тұрғындар мен құтқару қызметкерлерін қорғау міндет екенін тағы да еске салды.

Осыған дейін ДСҰ-ның Газадан медициналық эвакуацияны тоқтатқанын хабарладық.

Ал Aljazeera АҚШ пен Иран арасында екі аптаға арналған уақытша бітім туралы келісімге қарамастан, Израиль Газа секторын бомбалап жатқанын жазды.