Германия канцлері сайлауда жеңіске жеткен ультраоңшылдармен ынтымақтастықты жоққа шығарды

Германия канцлері Фридрих Мерц Саксония-Анхальт жерінде өткен сайлауда оңшыл радикалды "Германия үшін балама" партиясы бірінші орынға шыққаннан кейін, аталған ұйыммен ынтымақтастық орнату мүмкіндігін жоққа шығарды. Дегенмен ол бұл нәтиже өз партиясын "іргетасына дейін теңселткенін" мойындады, деп хабарлайды Tengrinews.kz. Reuters агенттігіне сілтеме жасап.

"Германия үшін балама" (AfD) Саксония-Анхальт жеріндегі сайлауда көш бастады. Мерц бұл нәтиже өз партиясын "есеңгіретіп тастағанын" ашық айтты.

AfD дауыстардың 44 пайызға жуығын иеленіп, ландтагтағы 83 орынның 39-ына ие болды, бірақ абсолютті көпшілікке қол жеткізе алмады. Енді партия үкімет құру үшін жекелеген консерватор депутаттардың қолдауына ие болудан дәмелі.

Дауыс беру қорытындысы "қорғаныс кедергісіне" – Германияның жетекші партияларының, соның ішінде Мерцтің ХДО (CDU) партиясының AfD-мен жұмыс істеуден бұрыннан келе жатқан бас тарту ұстанымына үлкен сын болмақ. Бұл нәтижелер Германияның ішінде де, көршілес Франция мен Польшада да алаңдаушылық туғызды.

Мерц қызметтен кетуі мүмкін деген болжамдарды теріске шығарып, реформаторлық бағытын жалғастыратынын мәлімдеді. Ол қазіргі сәтті батыс құндылықтары үшін күрес деп сипаттап, НАТО бірлігінің маңыздылығын алға тартып, қорғаныс саласына ауқымды несие алу қажеттілігін қорғап шықты.

AfD-мен әріптес болуға дайын екенін білдірген жалғыз күш – популистік солшыл BSW партиясы болды. Олар жаппай иммиграцияға қарсы қатаң ұстанымда және Украинаға қолдау көрсетуді тоқтатып, Мәскеумен байланысты қалпына келтіруді жақтайды. Екі тарап та Ресейге қарсы санкцияларды неміс бизнесі үшін "өзін-өзі құрту" деп сынайды.

ARD мәліметтері бойынша, "Еуропадағы бейбітшілік" мәселесі сайлаушылар таңдауына әсер еткен екінші маңызды фактор болды. Мерц Украина мен Ресейге қатысты бағыттың өзгермейтінін кесіп айтты.

Саксония-Анхальт – бұрынғы коммунистік Шығыс Германиядағы салыстырмалы түрде шағын әрі ең кедей аймақтардың бірі.

Мәліметтерге сүйенсек, AfD-ны әсіресе ерлер қауымы белсенді қолдаған (әйелдер арасындағы 39 пайызға қарсы ерлердің 50 пайызы). Оған дауыс бергендердің арасында экономикалық тұрақсыздығы бар және білім деңгейі төмен адамдар жиі кездеседі. Шығыс Германияда ностальгия факторы да өз рөлін атқарған.

ЕО-дағы оңшыл радикалды көшбасшылар сайлау қорытындысын қуана қарсы алды. Ал Францияның қаржы министрі Ролан Лескюр бұл сигналды қауіпті деп атады.

Таяу апталарда Мерцті тағы бірнеше аймақтық сайлау күтіп тұр. Ол реформалар мен мақсатты шығындардың үйлесімі Германия экономикасына жан бітіреді деп үміттенеді.

Google News арқылы жаңалықтарымызды қадағалаңыз