Германияда қылмыстық топтар түрік кәсіпкерлеріне қысым көрсетіп келеді

Анкара Германиядағы түрік қылмыстық топтарының белсенділігі артып, түрік текті кәсіпкерлерге қысымды күшейткеніне алаңдаушылық білдірді.

Түріктің hurriyetdailynews басылымының хабарлауынша, Берлин мен Солтүстік Рейн-Вестфалия штаты сияқты бірнеше аймақта бопсалау, қоқан-лоққы жасау, өртеу және қарулы шабуылдар тіркелді.

Түркия ішкі істер министрі Мұстафа Чифтчи телефон арқылы сөйлескен кезде неміс әріптесі Александр Добриндтпен жағдайды талқылады. Түрік тарапы ұйымдасқан қылмыстық желілер төніп тұрған қауіп-қатердің артып келе жатқанына тоқталып, «жаңа буын қылмыстық ұйымдармен» күресте Германиямен ынтымақтастықты кеңейтуге және неміс полициясының түрік диаспорасын қорғауға белсендірек қатысуына шақырды.

Ең белсенді топтардың қатарында «Daltons», «Caspers», «Sarals» және «Bayğaras» аталады. Түркияның тәуелсіз өнеркәсіпшілер мен кәсіпкерлер қауымдастығы (MÜSİAD) мүшелеріне қатысты жағдайларды қоса алғанда, 60-тан астам бопсалау дерегі тіркелген.

Соңғы оқиғалардың бірі сәуір айының басында Нюрнберг қаласында болды: бопсалаушыларға ақша төлеуден бас тартқаннан кейін түрік кәсіпкерінің көлігі мен жылжымайтын мүлкі өртелген.

Түркия билігінің мәліметінше, Германияда 18 қылмыстық желімен байланысы бар 32 адамға іздеу жарияланған. Күдіктілердің бір бөлігі ұсталғанымен, Түркия қалғандарын қамауға алып, экстрадициялауды талап етті.

Айта кетейік, Түркияның Әділет министрлігі ашылмай қалған қылмыстарды қайта зерделеуге бағытталған реформаны қолға алды.