GovHR Forum 2026: Цифрландыру және HR трансформациясы

Халықаралық GovHR форумы Мемлекет басшысы Қасым-Жомарт Тоқаевтың құттықтау хатымен ашылды.

Мемлекет басшысының құттықтау хатында мемлекеттік басқару саласын сапалық тұрғыдан және адам ресурстарын жан-жақты дамыту тұтас халықаралық қауымдастыққа ортақ өзекті мәселелер екендігі айтылып, «Біз мемлекеттік қызмет жүйесінде меритократия қағидатын орнықтыруға, ашықтықты қамтамасыз етуге, жоғары кәсіби этиканы және сыбайлас жемқорлыққа қарсы сана-сезімді дәріптеп, адалдық мәдениетін қалыптастыруға баса мән береміз. Бірегей жиын барысында цифрландыру мен жасанды интеллект дәуіріндегі орасан зор мүмкіндіктің арқасында адам капиталын күшейтуге, мемлекет тарапынан көрсетілетін қызметтердің деңгейін мейлінше арттыруға ықпал ететін тың тәсілдер ұсынылады деп сенемін», делінген.

Форумға GRECO Президенті Дэвид Мейер, БҰҰ Даму бағдарламасының Қазақстандағы тұрақты өкілі Катаржина Вавьерня, Черногория Мемлекеттік басқару министрі Мараш Дукай, Жапонияның Ұлттық кадр басқармасының халықаралық істер және оқыту жөніндегі бас директоры Мио Маэда, Түркия Республикасы Президенті Бас хатшылығының кадр мәселелері және қызмет қағидаттары жөніндегі бас директоры Билал Шентюрк, Босния және Герцеговина Федерациясы Мемлекеттік қызмет агенттігінің директоры Рефик Бегич, Португалия Республикасы Сыбайлас жемқорлыққа қарсы ұлттық механизмінің (MENAC) төрағасы Жозе Антониу Мураш Лопеш, сондай-ақ БАӘ, Румыния, Қытай, Ганконг, Ұлыбритания, Әзербайжан, Армения, Иордания, Кипр, Қырғызстан, Моңғолия, Тәжікстан, Өзбекстан, Түркіменстан, Финляндия, Сингапур сияқты әріптес елдер мен отандық уәкілетті органдарының басшылары, жетекші мамандар және сарапшылар қатысып жатыр.

Мемлекет басшысы ауқымды цифрландыру стратегиясын бекітті

Іс-шарада Агенттік төрағасы Дархан Жазықбай форумның мемлекеттік қызметті дамытуға бағытталған инновациялық шешімдерді қалыптастырудағы маңызын атап өтті.

Сонымен қатар, елімізде жүргізіліп жатқан конституциялық және институционалдық реформаларға тоқталып, адам құқықтары мен оның мүдделерін ең жоғары құндылық ретінде бекіткен Халықтық Конституцияның жаңа мемлекеттік басқару философиясын айқындағанын айтты.

Дархан Жазықбай Конституцияда адам капиталына, білім мен ғылымға, инновацияға басымдық берілгенін атап өтті. Оның айтуынша, мемлекеттік қызмет патриотизм, кәсібилік, ашықтық, әдептілік және клиентке бағдарлану сияқты құндылықтарға негізделген жаңа мәдениетке көшіп жатыр.

ЕАЭО-ға мүше мемлекеттер басшылары Еуразия экономикалық форумы аясындағы көрмені тамашалады

Сондай ақ мемлекеттік қызметке іріктеу, өткеру және кадрлық процестерді цифрландырудағы реформаларға тоқталды. Мәселен конкурстық рәсімдер толық цифрлық форматқа көшіп, іріктеуді  өткізу мерзімдері 23-30 жұмыс күнінен 5-7 жұмыс күніне дейін қысқартылды. Азаматтардың конкурсқа қатысу деңгейі дәстүрлі іріктеу жүйесімен салыстырғанда 3,5 есеге артқан.  Жаңа заңда «Б» корпусы қызметшілері үшін горизонталды мансаптық ілгерілеу, лауазымдық жалақыларды кемінде үш жылда бір рет міндетті түрде индекстеу, лауазым үш айдан астам уақыт бойы бос тұрған жағдайда конкурсты автоматты түрде жариялау қарастырылған.

«Цифрландыру және жасанды интеллект жылы» аясында Alem.cloud ұлттық суперкомпьютері мен 100-ден астам автоматтандырылған агенті бар мемлекеттік жасанды интеллект платформасы іске қосылды. AI Qyzmet бағдарламасы аясында 52 мыңнан астам әкімшілік мемлекеттік қызметші оқытудан өтті.

Мемлекет басшысының «Халық үніне құлақ асатын мемлекет» тұжырымдамасына сәйкес азаматтардың пікірлері мемлекеттік органдар қызметінің тиімділігін айқындайтын көрсеткіш ретінде бағаланады. Сондай-ақ Агенттік жүзеге асырып отырған қашықтықтан мониторинг нәтижесінде өткен жылы 2 600-ден астам азаматтың құқықтары қалпына келтірілгені атап өтілді.

Көкшетауда «Aqmola Urban Forum» республикалық форумы өтті

Сонымен қатар Агенттік төрағасы халықаралық ұйымдардың стандарттарына сәйкес алдағы 5 жылға арналған сыбайлас жемқорлыққа қарсы күрес бойынша жаңа стратегиялық құжатты әзірлеу жұмыстары басталғанын айтты. Бұл құжат сыбайлас жемқорлық тәуекелдерінің алдын алуға, мүдделер қақтығысын тиімді басқаруға және сыбайлас жемқорлыққа қарсы мәдениетті дамытуға бағытталады.

20 елден келген 50-ден астам сарапшы HR процестерді жетілдіру, цифрландыру мен жасанды интеллектіні басқару ісіне енгізу, сыбайлас жемқорлықтың алдын алу мен қызметтердің сапасын арттыруға бағытталған сессияларда пікір алмасады.

GovHR форумы – мемлекеттік кадр қызметін жетілдіруге, заманауи HR құралдарын енгізуге және адами ресурстарды басқару жүйесін жаңа сапалық деңгейге көтеруге бағытталған маңызды халықаралық алаң.