Грант дауы: Таразда алаяқтарға сенген үш адам 3,1 млн теңгесінен айырылып қалды

Фото: Polisia.kz

Тергеу барысында анықталғандай, биылғы ақпан айында жәбірленушілер әлеуметтік желіден жеке кәсіп ашуға немесе кәсіпкерлік қызметті дамытуға арналған ірі мемлекеттік грант алуға көмектесетіні туралы жарнаманы көрген. Ұсынысқа қызыққан олар көрсетілген сілтеме арқылы өтіп, мессенджерде хат алмасуды жалғастырған.

Polisia.kz мәліметінше, өзін мемлекеттік бағдарламалар жөніндегі маман ретінде таныстырған әйел бұған дейін көптеген азаматқа қайтарымсыз мемлекеттік грант алуға көмектескенін айтқан. Жеке деректерді тексергеннен кейін ол жәбірленушілерге 13-13,6 миллион теңге көлеміндегі грант мақұлданғанын хабарлаған.

«Кейін әйел жеке кәсіпкерді тіркеу, құжаттарды рәсімдеу, конкурсқа қатысу, комиссиялық төлемдер мен басқа да шығындарды өтеу қажет деген түрлі сылтаулармен азаматтарды ақша аударуға көндірген.

Уәдеге сенген жәбірленушілер көрсетілген банк шоттарына тиісінше 1 миллион 285 мың теңге, 1 миллион 90 мың теңге және 803 мың теңге аударған», делінген хабарламада.

Әлеуметтік желідегі алаяқтық: 3 миллион теңгені иемденген күдікті қолға түсті

Ақшаны алғаннан кейін күдікті құжаттардың қаралып жатқанын, конкурс сәтті өткенін және грант қаражаты жақын арада шоттарына түсетінін айтып, азаматтарды сендіруін жалғастырған. Алайда уәде етілген грант берілмеген.

Біраз уақыттан кейін әйел байланысқа шығуды тоқтатып, содан соң жәбірленушілер полицияға арызданған.

Күдікті ұсталды. Қылмыстық істер тіркелді.

«Зейнетақыңызды көбейтеміз»: жаңа алаяқтық тәсіл пайда болды

Оқиғаның барлық мән-жайын анықтауға бағытталған сотқа дейінгі тергеп-тексеру жүргізіліп жатыр.

Еске салайық, бұған дейін Астанада грантқа түсіремін деп 111 адамды алдаған алаяқ сотталды.