Грекияда Қазақстан азаматы 125 жылға сотталды: СІМ мән жайды хабарлады

Сыртқы істер министрлігі Грекияда түрмеде отырған Қазақстан азаматына қатысты жағдайға пікір білдірді, деп хабарлайды Tengrinews.kz.

"Мигранттарды заңсыз тасымалдау"

Сыртқы саяси ведомство Қазақстан азаматы Грекия сотының шешімімен мигранттарды заңсыз тасымалдағаны үшін жауапкершілікті көздейтін бап бойынша сотталғанын хабарлады.

Жергілікті заңнамаға сәйкес, бұл әрекет ауыр қылмыстар санатына жатады.

"Грекиядағы дипломаттарымыз өз құзыреті шегінде азаматқа қажетті консулдық-құқықтық көмек көрсетіп жатыр. Мәселе министрліктің бақылауына алынды", - деп атап өтті ведомствоның ресми өкілі Ерлан Жетібаев.

Еске сала кетейік, бұған дейін Ақтөбе тұрғыны Нұрхан Қадырова Қазақстан СІМ-не Грекия түрмесінде екі жылға жуық отырған ұлына қатысты іске көмектесуді сұрап жүгінген болатын. Анасының айтуынша, ол 125 жылға бас бостандығынан айырылған.

Анасының сөзінше, ұлы кететінін ешкімге айтпаған. Кейін оған ұлының Түркияға жұмысқа ұшып кеткені туралы айтылған, содан кейін жас жігіт грек түрмесінен хабарласқан. Әйелдің айтуынша, ұлы Instagram-дағы ұшу шығыны төленетін және туристермен жұмыс істеуді уәде еткен хабарландыруға жауап берген, алайда кейін ол заңсыз мигранттарды тасымалдау ісіне тартылған көрінеді. Әйел ұлы бұл схеманың ұйымдастырушысы емес, өзі алдаудың құрбаны болды деп санайды.

Google News арқылы жаңалықтарымызды қадағалаңыз