Ғылымға сүйенген өркениет: Қазақстанның жаңа технологиялық бағыты

Президент Жолдауынан кейін Қазақстанда жасанды интеллектке арналған инновациялық қала бой көтермек, деп хабарлайды Arasha.kz.

Қазіргі заманда әлем елдері ғылым мен білімге сүйеніп, инновациялық технологияларды дамытудың жаңа кезеңіне қадам басты. АҚШ-тағы әйгілі Кремний алқабы (Silicon Valley) бүгінде заманауи жаңалықтардың ордасына айналып, жаһандық деңгейде технология көшбасшысы атанды. Одан өзге де мемлекеттер бұл бағытта айтарлықтай табысқа жетуде.

Мәселен, Қытайдың Бейжің мен Шэньчжэнь қалалары, Оңтүстік Кореядағы Панген технопаркі, сондай-ақ «Үндістанның Кремний алқабы» атанған Бенгалуру қаласы – инновациялық даму үлгісін көрсетіп отырған орталықтар. Еуропадағы Франция, Германия, Ұлыбритания, сондай-ақ Азиядағы Сингапур мен Малайзия сынды елдер де технологиялық серпіліс арқылы өз орнын нықтап үлгерді.

Бүгінгі әлемде күш пен байлық емес, ғылым мен технологияның қуаты басты орынға шықты. Сондықтан Қазақстан да өз даму бағытын жаңа технологияларға, ғылым мен білімге бағыттауы қажет. Өйткені елдің өркендеуі мен болашағы – интеллектуалды капиталға, инновациялық әлеуетке тікелей байланысты.

Осы бағытта Мемлекет басшысы Қасым-Жомарт Тоқаев биылғы 8 қыркүйекте халыққа арнаған Жолдауында «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» тақырыбын көтерді. Бұл – еліміздің цифрлық болашағын айқындайтын маңызды саяси құжат болды.

Жолдау аясында Қазақстан Республикасының Жасанды интеллект және цифрлық даму министрлігі құрылып, жаңа экономикалық бағыттың негізі қаланды. Сондай-ақ Алматы агломерациясының маңында жасанды интеллект пен жоғары технологиялар дамитын инновациялық “Alatau City” (Алатау Сити) қаласы бой көтермек.

Бұл жоба – еліміздің ғылыми-инновациялық дамуын жаңа деңгейге шығаратын стратегиялық бастама. Алатау Сити Қазақстанның «Кремний алқабы» бола ала ма? Мұны уақыт көрсетеді. Дегенмен, ол аймақтағы ғылым, техника мен технологияның дамуына серпін беретін орталыққа айналары сөзсіз.

Алда жауапты министрліктер мен ведомстволарды үлкен міндет күтіп тұр. Президент тапсырмаларын жүйелі орындап, елдің технологиялық өрлеу бағытын нақты іспен жүзеге асыру – Қазақстанның жаңа инновациялық өркениетке қадам басуының басты кепілі болмақ.