Хабар агенттігінің қызметкерлері марапатталды

30 жыл «Хабар» агенттігі үшін тарих қана емес, тұтас тағдыр. Осы жылдар ішінде арна елдің үніне айналып, көрерменмен бірге қалыптасты.

Камераның ар жағындағы мыңға тарта жанның еңбегі осы тұрақтылықтың кепілі. Бүгін 140 маманның қажырлы қызметі лайықты бағаланды.

Отыз жылда «Хабар» елдің айнасына, көрерменнің көзайымына айналды. Бүгін жылдар бойы ақпараттың алдыңғы шебінде жүрген мамандар марапатталды. Олардың бірі - Бағдат Әбдіқожаева. Ол өз еңбек жолын «Хабардың» Қызылорда облысындағы меншікті тілшісі болып бастаған. Жаңалықтың ыстығы мен суығын қатар көріп, аймақ тынысын көрерменге жеткізді. Қазір арнаның жаңалықтар бөлімінде шығарушы редактор болып еңбек етеді. Кәсібіне адалдығы мен табандылығы бағаланып, мерейтойлық марапатқа ие болды.

Бағдат Әбдіқожаева, «Хабар» Агенттігі» АҚ АСБҚ шығарушы редакторы:

- Хабар бізге не берді? Хабар бізге кәсіби өсу берді, Хабар бізге өзіміздің мамандығымызға адал қызмет ету мүмкіндігін берді. Хабар бізге елге танылып, елдің 30 жылдағы , дамуы, қалыптасу тарихын көрерменге жеткізуді мүмкіндігін берді. Хабарда қызмет еткенімді мақтан тұтамын. Хабардың арқасында мен өте биік деңгейдегі, кәсіби мамандармен әріптес болдым. Агенттіктің әрі қарай да өсіп өнуі үшін адал еңбек етемін.

Камера сыртында да көрерменге айтарлықтай еңбек сіңіріп жүрген мамандар аз емес. Олардың бірі телеоператор Серік Қоңырбаев.Ол он бес жылдан астам уақыт бойы елдің тарихи сәттерін объектив арқылы көпшілікке жеткізіп келеді.

Серік Қоңырбаев, «Хабар» Агенттігі» АҚ телеоператоры:

- Хабар агенттігінің әлі алар белесі алда, жетістігі көп болсын. Біз келген кезде dvk.dvc pro ауыр камералар болды. Қазір техника өзгерді, жеңіл, біз түсірген камералар 12 кг болатын, қазіргідер жеңіл, техникалар дамып кетті.

Ақпарат тасқыны тегеурінді, интернет заманы талғампаз. Бірақ соның ішінде «Хабар» өз үні мен бағытын жоғалтқан жоқ. Эфирде өзекті жаңалықтар, сапалы сериалдар, көркем және деректі фильмдер көрсетіліп келеді. Осының бәрінде кәсібіне адал мыңдаған маманның тынымсыз еңбегі жатыр. Сол жандардың бірі – «24KZ» арнасының режиссері Эльмира Досжан. Ол тележурналистика саласында жиырма жыл еңбек етіп келеді. Бастапқыда музыкант мамандығын меңгерген ол кейін шығармашылық жолын теледидармен байланыстырған.

Эльмира Досжан, «24 KZ» арнасының режиссёрі:

- Бүгін өте толқулы күн, 30 жыл деген ол өте үлкен уақыт. Бүгінгі марапат менің ғана марапатым деп ойлмаймын. Бүкіл ұжымның марапаты. Әрине толқу бар. Осынша уақыттың зырғып өтіп кеткеніне өзімде толқып тұрмын.

Агенттік медианарықта заманауи технологияларды енгізуден де көш бастап тұр. Уақытпен үндесіп, жаңашылдықпен жетілген ұжым студиядағы жұмысты заманауи сипатқа ие етті. Мәселен, операторсыз жұмыс істейтін автоматтандырылған камераларды алғаш болып «24KZ» арнасы орнатқан. Сондай-ақ тікелей эфир жүргізу ісінде де арна алдыңғы орында. Заман көшінен қалмаған агенттіктің материалдық-техникалық әлеуеті артып, заманауи медианың жаңа белесіне көтерілді.

Кемелбек Ойшыбаев, «Хабар» Агенттігі» АҚ басқарма төрағасы:

- Көптеген ауыспалы жағдайларда Хабардың негізін сақтай біліп, сонымен қатар сабақтастықты жалғастыратын қызметкерлеріміз, 140-тай әріптестеріміз осы 15 жылдан астам уақыт жұмыс істеп келе жатырғандығы қуантады. Көрерменіміз көп болу үшін сапалы дүние жасауымыз керек. Сапалы жобалар жасау керекпіз. Сол бағытта алға қойып отырған мақсат міндетті түрде хабар тарататын болсақ, ол тексерілген ақпарат болу керек. Екіншіден, жобаларды жасаған кезде, түрлі-түрлі жобаларды жасаған кезде сапалы бағдарлама жасау керекпіз.

Тәуелсіздікпен бірге түлеген телеарна алғаш рет 1994 жылы эфирге шыққан еді. Сол күннен бастап «Хабар» елдің даму жолын, халықтың тынысын, уақыттың үнін үздіксіз жеткізіп келеді.

Авторлары: Наргиз Бекмаганбетова, Самат Қазанбаев