Халықаралық турнирдің ашылу салтанаты

Премьер-министр Олжас Бектенов үстел теннисінен Президент кубогіне арналған халықаралық турнирдің ашылу салтанатына қатысты.

Үкімет басшысы бұқаралық спортты дамыту бағытында атқарылып жатқан жұмыстарға тоқталды.

«Мемлекет басшысы Қасым-Жомарт Тоқаев бұқаралық спортты дамытуға ерекше көңіл бөледі. Үстел теннисі бұқаралық спорт қозғалысын қалып­тастыруға және саламатты өмір салтын насихаттауға елеулі үлес қосады», деп атап өтті О.Бектенов.

Елімізде бүгінде 260 мыңнан астам адам үстел теннисімен тұрақты түрде айналысады. Ал салада 10 мыңнан астам кәсіби спортшы мен 400-ге жуық жаттықтырушы жұмыс істейді.

Ел көлемінде 20 өңірлік федерация бар, 12 заманауи үстел теннисі орталығы, 30 жаңа бөлімше және 35 мамандандырылған зал ашылған.

Спортшыларымыз халықаралық ареналарда табысты өнер көрсетіп жүр. Кейінгі екі жылда олар 85 медаль жеңіп алды, оның 31-і – алтын. Олардың арасынан Олимпиада ойындарының қатысушысы Кирилл Герасименконы, жастар арасындағы әлем чемпионы Алан Құрманғалиевті, халықаралық турнирлердің жеңімпаздары Зәуреш Акашева және Сарвиноз Миркадироваларды ерекше атап өту керек.

2023 жылы Астанада алғаш рет үстел теннисінен Азия чемпионаты өткен еді. Енді 2027 жылы Қазақстанда әлем чемпио­натын өткізу жоспарланып отыр.

Премьер-министр Президент кубогіне арнап турнир өткізу отандық спортты әлемдік деңгейге көтеру мақсатындағы маңызды қадам екенін және мұнда Қазақстан мен шетелдердің мықты теннисшілері бас қосатынын атап өтті.

Ашылу салтанатында Халықаралық үстел теннисі федерациясының бас хатшысы Рауль Калин де сөз сөйледі. Ол Қазақстанның тәуелсіздік жылдарындағы дамуына, елдің спортты дамытуға қосқан үлесіне оң баға берді, сондай-ақ Президент Қасым-Жомарт Тоқаевқа үстел теннисіне қолдау көрсетіп келе жатқаны үшін алғысын білдірді.