Индерде төрт жылдан бері мектеп интернаттың құрылысы аяқталмай тұр

Осы уақыт ішінде жоба құны екі есеге өсті, ал әкімдік бас мердігермен соттасуға кірісті.

Индербор ауылында 300 орындық мектеп-гимназия мен 200 орындық интернаттың құрылысы 2022 жылы басталған еді. Жобалық-сметалық құжаттаманы облыстық құрылыс, сәулет және қала құрылысы басқармасының тапсырысы бойынша «Aspan Engineering Group» ЖШС 11,5 млн теңгеге әзірлеген. Ал жалпы құны 2,6 млрд теңге болатын тендерді «Нуркапстройгаз» ЖШС жеңіп алған.

Тапсырыс берушінің мәліметінше, нысанды бастапқыда 10 ай ішінде пайдалануға беру жоспарланған. Алайда көп ұзамай құрылыс жұмыстары «құрылымдық бөлік пен технологиялық шешімдерге өзгерістер енгізу қажеттілігіне» байланысты тоқтатылған.

Жобалық-сметалық құжаттама түзетілгеннен кейін құрылыс-монтаж жұмыстарының құны екі есеге өсіп, 4,6 млрд теңгеге жетті. Ал құрылыс екі жыл бұрын қайта жалғасып, оны 2025 жылдың соңына дейін аяқтау жоспарланды.

«Бүгінде мердігер ұйым құрылыс жұмыстарын өте аз көлемде және баяу қарқынмен жүргізіп отыр, соның салдарынан бекітілген өндірістік кестеден едәуір қалып жатыр», – делінген облыс әкімдігінің жауабында.

Қазір мектеп-интернаттың тек жартысы ғана салынған (2,7 млрд теңге игерілген). Осыған байланысты тапсырыс беруші сотқа жүгініп, тұрақсыздық айыбын өндіру және мердігерді мемлекеттік сатып алулардың жосықсыз қатысушысы деп тануды талап етті.

Лев ГУЗИКОВ

Бүгін, 20:25