Инфляция ішкі туризмге жақсы әсер етіп жатыр сарапшы

Кәрі құда – қыс та келіп қалды. Бұл маусымның да өз қызығы жетерлік. Енді қысқы туризмнің нағыз қайнайтын шағы басталды. Мұндайда жұртшылық арзан әрі жайлы демалыс орындарын іздейді.

Кейінгі жылдары ел аумағында экотуризм мәдениеті дамыды. Ел жұрт табиғат аясында тынығуға құштар. Биыл алғашқы алты айда ел ішінде 3 млн 900 мыңнан астам азамат саяхаттады. Бұл былтырғымен салыстырғанда 500 мыңға көп. Ал қысқы демалысты қызықты өткізу үшін қайда бару керек?

Жыл сайын елдегі ірі демалыс орындары мыңдаған турист қабылдайды. Былтыр Шымбұлаққа 1,5 млн адам келген. Ойқарағайды 380 мыңға жуық саяхатшы көрсе, шығыстағы Алтай Альпілері тау-шаңғы кешеніне шамамен 66 мың азамат ат басын бұрған. Бүгінде 17 тау-шаңғы курорты бар. Қазір оның 15-і жұмыс істеп тұр.

«Ішкі туризмнің дамуына инфляцияның да ықпалы бар», – дейді сарапшылар. Мәселен, әйгілі Альпі баурайындағы Швейцария, Франция, Австриядағы демалыс құнын қымбатсынған шетелдіктер ел ішіндегі туристік нысандарға ағылады. Ал қар жауса, шекара асып, сыртқа аттанатын отандастарымыз да кейінгі кезде өзіміздегі қалың қарлы курорттарды таңдайтын болған.

Жансая Меңлібаева, сарапшы:

- Позитивті тұрғыда инфляция біздің ішкі туризмге жақсы әсер етіп жатыр деп айтқым келеді. Өйткені сыртқы туризмда бағаның өсуіне байланысты көп адам ішкі туризмға артып жатыр. Ішкі туризм ондай қатты қымбат емес, қолжетімді және бізде таңдау бар. Әр кезеңде адам қай демалысты қалайды, соған барып демалады.

Отандық туристік орталықтарға деген қызығушылықтың артқанын саладағы кәсіпкерлердің табысынан байқауға болады. Олар жыл басынан бері  көрсетілген қызмет үшін 151 млрд теңге пайда тапқан. Бұл өткен жылмен салыстырғанда 30 млрд-қа көп. Ал, негізгі капиталға тартылған инвестиция көлемі қаңтар-қазан аралығындағы есеп бойынша 923 млрд теңге. Бұдан бөлек туристік әлеуеті жоғары аумақтарда нысан салған іскерлерге инвестициялық жеңілдіктер қарастырылған.

Нұртас Кәріпбаев, ҚР ТСМ Туризм индустриясы комитетінің төрағасы:

- Мемлекет қолдауы бар. Егер кәсіпкер қонақүй салса, оған мемлекет 10% шығынын қайтарып береді. Жол бойындағы қызмет көрсету объектілері деп атаймыз. Егер кәсіпкер салатын болса, оған да мемлекет 10% қайтарып береді. Тау-шаңғы курорттарына құрал-жабдықтар сатып алса, мемлекет оған 24% қайтарып береді. Сырттан келген шетелдік турист үшін туроператорларға мемлекет 15 мың теңгеден қаражат береді.

Туризм және спорт министрлігі отандық және шетелдік қонақтарға қысқы демалысқа арналған үздік 7 бағытты ұсынады. Оның екеуі Шығыс Қазақстанда орналасқан. Бірі Риддердегі Батыс Алтай мемлекеттік табиғи қорығы, екіншісі Катонқарағай ұлттық паркі. Одан бөлек бұл тізімде Алматының тау-шаңғы және қысқы спорт орталығы, Шымбұлақ, Бурабай, Шалқар-Имантау курорттық аумағы мен Жоңғар Алатауы бар. 

Алайда негізгі туристік орталықтардан бөлек, елдің өзге өңірлерінде де қысқы туризмді дамыту керек. Бұл туристік ағынды теңдей бөліп, ірі кешендерге түсетін жүктемені азайтуға мүмкіндік береді. «Елдің әр өңірінде қызықты демалыс нысандары көп, оларды дамытса, туристерге жаңа бағыттар ашылар еді», – дейді сарапшы.

Жансая Меңлібаева, сарапшы:

- Оңтүстік Қазақстан өңірінде тау шаңғысымен айналысатын жерлер бар. Төлеби ауданы, Қасқасу. Біз ауыртпашылық түсіп жатқан Шымбұлаққа ғана емес, адамдарды басқа бағыттар бойынша да демалысқа жібере аламыз. Мысалы, Кеген ауданында үлкен айсберг ретінде мүсін пайда болады. Сол жерге адамдар барып демалғысы келеді. Ол жақта да таулы жерлер бар. Біз қысқы туризмді белсенді спорт түрлерімен ғана айтып кетеміз. Бірақ қысқы туризмге, одан бөлек, сақ моншаларын да кіргізуге болады, Шонжыдағы ыстық қайнар көздерін де кіргізуге болады.

Биыл алғашқы жартыжылдықта 7,5 миллион шетелдік туристік мақсатта келген. Өйткені еліміздің тау-тасы, сай-саласы, ойпаң-шоқысы қолмен ойып салғандай әдемі. Әсіресе Алматы – асқар таулы, бақша-баулы мекен. Қысқы демалысты қызықты өткізуге қолайлы тағы бір жер – Іле-Алатау ұлттық паркі. Табыстың көзі табан астында. Тек инфрақұрылымды жетілдіріп, турист тартудың көзін табу маңызды.

Авторлары: Дильназ Тұрғазыева, Руслан Алиев, Әлібек Әлиев