Инватакси қызметіне шағым жоқ

Дамыған елдерде мүгедектігі бар адамдардың өзі қалаған жерге емін-еркін, еш кедергісіз барып-келуіне жағдай жасалған. Оларды әлеуметтік тұрғыдан қолдау мәселесі бізде де мемлекеттік саясаттың негізгі бағыттарының бірі. Кейінгі жылдары Еңбек және халықты әлеуметтік қорғау министрлігі бастамашы болып, инватакси қызме­тіне өзгерістер еніп жатыр.

Суретті түсірген – Ерлан ОМАР, «EQ»

Мемле­кеттің, жалпы қоғам­ның ортақ мақсаты – мүгедектігі бар адам­дарды мүсіркемей, алаламай, қоғамға бейімдеу. Яғни олардың өмір сүру сапасын арт­тырып, қоғамда жалғыз, жат сезінбеуіне ықпал ету. Біз айтқалы отырған инватакси қыз­метіндегі өзгерістер мүге­дектігі бар адамдарды қолдауға бағытталған үлкен жұмыстың бір тармағы ғана.

Биыл ерекше қажеттіліктері бар адамдарға инватакси қыз­метін көрсету кезінде такси агре­­гаторларын пайдалану жө­­ніндегі қанатқақты жоба бас­­талған-ды. Соның шеңбе­рінде Астана, Алматы қалала­рында 443,9 мың қызмет көрсе­тілген. Яғни екі ірі қалада осын­ша адам инватакси қызме­тін пайдаланған. Былтыр мүге­дек­­тігі бар адамдарға инватакси қыз­меті 207,2 мың рет көрсетілген.

Енгізілгелі отырған өзгеріс­тегі басты шарт сапарлардың ақысынан пайыздың болмауы, олар әдетте агрегатор плат­фор­­маларының пайдасына ауда­­­рылатын. Яндекс компа­ния­­сы қанатқақты жобаға өтеусіз негізде қатысуға ниет білдірген. Жоба шеңберінде азаматтар Яндекс Go мобильді қосымшасы арқылы инватакси қызметін қолдана алады. Бұл қызметті алушыға көлікті тезірек таңдауға, онлайн режім­де тапсырыс мәртебесін қада­ғалауға, жасалған сапарларға мониторинг жасауға мүмкін­дік береді. Қосымшада мүге­дек­тігі бар адамдардың жүргі­зу­шіге сапардағы ерекше қа­жеттіліктері туралы ескертетін арнайы мүмкіндіктер экраны іске қосылды. Өз кезегінде жүр­гізушілер жолаушыны көлікке отырғызу, одан түсерде қалай кө­мек көрсетуге болатыны се­кіл­ді арнайы нұсқаулар алады.

Еңбек және халықты әлеу­меттік қорғау министрлігі әкім­діктермен бірлесіп инватакси қызметіне тағы бір өзгерту енгізу туралы шешім қабылдады. Енді азаматтар инватакси қызметін алардан бір күн бұрын смартфон арқылы жазылуы қажет. Сапар­ды алдын ала жоспарлау де­генге көпшілік қырын қа­­рауы мүмкін. Бірақ көп қала­да инватакси қызметтерін ұсы­на­тын көлік құралдарының тап­шы­лығы бар екенін ескерген дұрыс. Осы тұрғыдан алғанда сапарды алдын ала жоспарлау жүргізушіге де, жолаушыға да тиімді.

Инватакси шақырарда же­дел­дік пен сапаға кепіл бола­тын жобаны алдағы уақытта Астана, Алматы қалаларымен қатар, еліміздің басқа өңірі­не де тарату жоспарланып отыр.