Биыл адамдардан медициналық санитариялық алғашқы көмек қызметіне 3 мыңға жуық шағым түскен

АСТАНА, 29 тамыз – Sputnik. Биыл адамдардан медициналық-санитариялық алғашқы көмек қызметіне 3 мыңға жуық шағым түскен, деп хабарлады үкімет.

Бұл туралы денсаулық сақтау министрінің міндетін атқарушы Ақмарал Әлназарова медициналық қызметтердің сапасын арттыру мәселелері жөнінде кеңесте айтты.

2026 жылдың алғашқы жартысында медициналық-санитариялық алғашқы көмек ұйымдарына азаматтар 62 млн рет жүгінген, 2 925 шағым түскенін хабарлады.

"Шағымдардың басым бөлігі бейінді мамандарға қолжетімділікке, қабылдауға жазылу мен пациенттерді тиісті мамандарға бағыттауға, медициналық әдептің сақталуына, диспансерлік бақылаудың уақтылы жүргізілуіне және дәрі-дәрмекпен қамтуға қатысты болды", - деді Әлназарова.

Шағым санының ең жоғары өсімі Маңғыстау облысында тіркеліп, 4,3 есе артқан. Шығыс Қазақстан облысында бұл көрсеткіш – 2,6 есе, Қарағанды облысында – 2,3 есе, Ақмола облысында – 2,1 есе, ал Астанада екі есе өскен.

Кеңес қорытындысы бойынша өңірлерде тәжірибелі дәрігерлердің, мәслихат депутаттары мен қоғамдық кеңес мүшелерінің қатысуымен арнайы штабтар құру тапсырылды. Олар мемлекеттік және жекеменшік емханалар мен стационарлардың жұмысын жан-жақты зерделеп, шағымдардың түсу себептерін анықтауға, сондай-ақ қызмет көрсету сапасы ұдайы төмен медициналық ұйымдар бойынша нақты ұсыныстар енгізуге тиіс.

Маңғыстау, Шығыс Қазақстан, Қарағанды және Ақмола облыстарындағы, сондай-ақ Астана мен Алматы қалаларындағы жағдайға ерекше назар аудару тапсырылды. Аталған өңірлердің әрқайсысы бойынша төмен көрсеткіштердің себептеріне жеке талдау жасалуы қажет.