Израиль Газа секторында әуе соққыларынан кейін атысты тоқтату режимін қайта енгізді

Израиль Қорғаныс армиясының (ЦАХАЛ) дерегінше, операция барысында ондаған нысан, соның ішінде командалық пункттер, қару-жарақ қоймалары мен тоннельдер жойылған. Израиль тарапының мәліметінше, шабуылдың негізгі мақсаты 2023 жылғы 7 қазандағы оқиғаларға қатысы бар 30-дан астам ХАМАС орта буын командирлерін жою болған.

– Ондаған террористік нысандар мен содырларға соққы берілгеннен кейін ЦАХАЛ атысты тоқтату режимін қайта қалпына келтіруге кірісті. Израиль келісім шарттарын қатаң сақтайды және кез келген бұзушылыққа қатаң жауап қайтарады, – делінген армияның мәлімдемесінде.

Израиль әскері операция ХАМАС тарапынан атысты тоқтату туралы келісімді бірнеше мәрте бұзуына, соның ішінде Газа секторының оңтүстігіндегі Рафах қаласында израильдік әскерге жасалған снайперлік шабуыл салдарынан бір сарбаздың қаза табуына жауап ретінде жасалғанын хабарлады.

Палестинаның Денсаулық сақтау органдарының дерегінше, соңғы әуе соққыларынан қаза тапқандар саны 104 адамға жетті, оның ішінде 46 бала бар. Тағы 253 адам жарақат алған.

ХАМАС өкілі Израильді «АҚШ қолдауымен жаңа тәртіпті күшпен орнатуға тырысып отыр» деп айыптап, аралық елдерді Тель-Авивке қысым жасауға шақырды.

Израиль Премьер-министрі Биньямин Нетаньяху бұған дейін ХАМАС-тың келісімді бұзғанын айтып, Газа секторына қуатты соққылар беруді тапсырған. Өз кезегінде елдің Қорғаныс министрі Исраэль Кац ХАМАС басшылары қай жерде болса да жауапкершіліктен құтылмайтынын ескертті.

– Костюм кигендер де, тоннельде тығылғандар да жауап береді. ЦАХАЛ сарбаздарына қарсы қол көтерген әр адам толық жауап береді, – деді министр.

Ал Еуропалық одақ барлық тарапты атысты тоқтату шарттарын қатаң сақтауға шақырды.

– Біз тараптарды келісімді бұзуы мүмкін кез келген әрекеттен бас тартуға шақырамыз. Бұл қақтығыстың әскери шешімі жоқ, – деді Еуропалық комиссия өкілі Ануар Эль-Анууни.

Еске салайық, атысты тоқтату режимі 2025 жылғы 10 қазанда күшіне енген болатын. Ол 2023 жылғы 7 қазанда ХАМАС жасаған шабуылдардан кейін басталған екі жылдық қақтығыстан соң орнаған еді.

Бұған дейін хабарланғандай, ХАМАС Израильге бұрын анықталған кепілдегінің сүйегін қайтарған.