Каналдан табылған қыздың өліміне күдікті Шиелі тұрғыны қамауға алынды

Қызылорда облысында канал шлюзінен табылған қыздың өліміне қатысты күдікті ұсталып, сот санкциясымен қамауға алынды, – деп хабарлайды Aikyn.kz сайты.

Облыстық полиция департаменті тергеу басқармасы бастығының міндетін атқарушы Асылбек Бексейітовтің айтуынша, қазіргі уақытта оқиғаның барлық мән-жайын анықтауға бағытталған жедел-тергеу шаралары жүргізіліп жатыр.

– Күдікті ұсталып, сот санкциясымен қамауға алынды. Қазіргі уақытта оқиғаның барлық мән-жайын анықтауға бағытталған жедел-тергеу іс-шаралары жүргізілуде. Тергеу мүддесіне байланысты сотқа дейінгі тергеп-тексеру деректері жарияланбайды, – деді ол.

Еске салайық, 3 маусым күні Шиелі ауданының тұрғыны полицияға канал шлюзінен қыздың денесі табылғаны туралы хабарлаған. Осы дерек бойынша адам өлтіру фактісімен қылмыстық іс қозғалды.

Марқұмның туыстарының айтуынша, бойжеткен 2 маусым күні кешкі уақытта үйінен шығып кеткеннен кейін қайта оралмаған.

Қызылорда облыстық полиция департаменті аталған іс бойынша тергеу жұмыстары облыстық полиция басшылығының қатаң бақылауында екенін мәлімдеді.