Каспий теңізінің биоресурстарын зерттеудегі Қазақстан Ресей ынтымақтастығы

Каспий теңізінің биологиялық ресурстарын сақтау және зерттеу Қазақстан мен Ресей арасындағы мемлекетаралық ынтымақтастықтың маңызды бағыттарының біріне айналды. Екі ел экология, қоршаған ортаны қорғау және трансшекаралық су ресурстарын тиімді пайдалану мәселелері бойынша бірлескен жұмыстар жүргізіп келеді.

Каспий маңы елдері – Қазақстан, Ресей, Әзербайжан, Түрікменстан және Иран теңіздің табиғи ресурстарын сақтау мақсатында ортақ бағдарламалар мен келісімдер негізінде жұмыс атқаруда. Қазақстан мен Ресей арасындағы осы саладағы үкіметаралық келісім 2004 жылы қабылданып, оны жүзеге асыру үшін бірлескен комиссия құрылған. 

Ғылыми ынтымақтастықтың негізгі бағыты каспий итбалығы мен бекіре тұқымдас балықтарды зерттеуге бағытталған.
«Қазыналы Каспий» форумында Каспий экожүйесін сақтау мәселелері талқыланды. 

Сарапшылар 2019–2024 жылдары Солтүстік Каспийде жүргізілген зерттеулердің нәтижелеріне тоқталып, каспий итбалығының популяциясы мен соңғы жылдары тіркелген өлім-жітім жағдайларының ықтимал себептерін сөз етті. Мамандар ықтимал факторлар ретінде А тұмауы вирусы мен морбилливирусты атады.

Форумда бекіре тұқымдас балықтарды сақтау мәселесі де көтерілді. Қазіргі уақытта Каспий маңы мемлекеттері олардың қорын қалпына келтіру мақсатында өндірістік аулауға қойылған мораторийді сақтап отыр.

Сондай-ақ Қазақстан мен Ресей 2025–2030 жылдарға арналған каспий итбалығы мен бекіре тұқымдас балықтардың популяциясын зерттеу бағдарламаларын бекіткен. Сонымен бірге каспий итбалығын қорғауға арналған мемлекеттік табиғи резерват құру жұмыстары жүзеге асырылуда.

Форумға қатысушылар Каспийдің биологиялық алуантүрлілігін сақтау тұрақты ғылыми мониторингті, табиғатты қорғау шараларын және мемлекетаралық ынтымақтастықты одан әрі күшейтуді талап ететінін атап өтті.

Кеше, 15:44