Катон Қарағайға әуе рейстері ашылады

Жақын уақытта Катон-Қарағай ауданына ұшақпен қатынау мүмкіндігі пайда болады.
Сонымен қатар Зайсан мен Кендірлі елді мекендерінде жаңа әуежайлардың құрылысы аяқталады. Бұл туралы Мәжіліс жанындағы Қоғамдық палата отырысында Көлік министрлігі Азаматтық авиация комитетінің төрағасы Салтанат Томпиева мәлімдеді.

Оның айтуынша, 2025 жылы азаматтық авиация саласында цифрландыру жұмыстары қарқын алған. Қазіргі кезде жолаушыларды биометриялық сәйкестендіру жүйесі ішкі рейстерде тестілік режимде қолданылып жатыр. Бұл жүйе Астана әуежайы базасында енгізілуде.

Сонымен қатар Алматы әуежайы мен Астана әуежайларында 8 автоматтандырылған паспорттық бақылау жүйесі орнатылған. 2026 жылы мұндай жүйелер Шымкент әуежайы, Ақтау әуежайы, Ақтөбе әуежайы және Павлодар әуежайы әуежайларында іске қосылады.

Комитет төрағасы елде ірі әуежайлармен қатар туристік бағыттарды дамытуға да басымдық беріліп отырғанын атап өтті. 2025 жылы:

Ақтау әуежайында ұшу-қону жолағы мен рульдеу жолдарына күрделі жөндеу жүргізілді;

Астана әуежайының ұшу-қону жолағы жөнделді;

Балқаш әуежайы терминалын реконструкциялау толық аяқталды.

Ал 2026 жылы бірқатар ірі инфрақұрылымдық жобалар іске асырылады. Атап айтқанда:

Алматы әуежайының ішкі рейстер терминалы қайта жаңғыртылады;

Атырау әуежайында жаңа терминал құрылысы басталады;

Ақтау әуежайының перроны күрделі жөндеуден өтеді;

Павлодар әуежайының аэродромы реконструкцияланады;

Астана мен Шымкент әуежайларында екінші ұшу-қону жолақтары салынады.

Салтанат Томпиеваның айтуынша, Мемлекет басшысының тапсырмасына сәйкес, 2026 жылы Катон-Қарағай, Зайсан және Кендірліде жаңа әуежайлардың құрылысы толық аяқталады. Сонымен қатар Арқалық әуежайын қалпына келтіру жоспарланып отыр.

Айта кетейік, жаңа әуежайларда ішкі рейстерді іске қосу үшін алғашқы жылдары мемлекеттік субсидия қарастырылуы мүмкін.