Кей түркістандықтар ұлттық киімді жыл он екі ай үстінен тастамай киіп жүр

25 жылдан бері ұлттық киімді серік еткен кейуана

Түркістан қаласының 87 жастағы тұрғыны Ырыс Ташметова ширек ғасырға жуық уақыт бойы ұлттық киімді өмір салтына айналдырған.

Фото Ырыс Ташметованың жеке архивінен

Ақжаулықты әже үшін бұл — жай киім емес, ұлттық болмысты сақтаудың және кейінгі ұрпаққа өнеге көрсетудің маңызды жолы.

Фото Ырыс Ташметованың жеке архивінен

— Адамның Отанға деген құрметі оның күнделікті тұрмысынан, соның ішінде киімінен де байқалады. Үйімде тігін машинам бар, әлі күнге дейін өз киімдеріме ою-өрнек салып, өңдеп киемін. Ұлттық киімнің кеңдігі — халқымыздың дархандығының белгісі. Ал жеті қабат бүрме — жеті қазына, жеті ата, жеті қат жер ұғымдарымен сабақтас. Бұрын аналарымыздың киіміне қарап-ақ оның шыққан ортасын таныған. Бұл — біздің мәдени кодымыз, — дейді ол.

Фото: Сәбит Тастанбек / Kazinform Фото Ырыс Ташметованың жеке архивінен Фото: Сәбит Тастанбек / Kazinform

Ұлттық киімді насихаттауды өмірлік ұстанымға айналдырған

Кәсіби медиатор Бақытжан Бейсембаев та ұлттық киімді күнделікті өмірге енгізу арқылы ұлттық сана қалыптасатынын айтады.

Фото Бақытжан Бейсембаевтың жеке архивінен

Ол бұл үрдісті жеке өзінен бастап, айналасына кеңінен насихаттап жүр.

Фото: Сәбит Тастанбек / Kazinform

— Ұлттық киім киіп жүргеніме 12 жылдан асты. Бұл бастаманы кеңінен насихаттап, достарыма, таныстарыма айтудан жалыққан емеспін. Қазір шамамен 20 шақты жақын танысым күнделікті киіміне ұлттық элементтер қосып жүр. Түркістанда қариялармен ай сайын бас қосып, елдік мәселелерді талқылаймыз. Осындай жиындарда ұлттық болмысты сақтау мәселесі жиі қозғалады. Әр халықтың өзіндік нышаны бар, ал біз үшін оның бірі — ұлттық киім. Сондықтан күнделікті киімде болсын, шағын болса да ұлттық өрнек болуы тиіс, — дейді ол.

Фото Бақытжан Бейсембаевтың жеке архивінен Фото Бақытжан Бейсембаевтың жеке архивінен

«Ұлттық киім тек мерекемен шектелмеуі керек»

Түлкібас ауданының тұрғыны, 70 жастан асқан Күміскүл Тұрсынбекова да соңғы 11 жыл бойы камзолын тастамай киіп келеді.

Фото Күміскүл Тұрсынбекованың жеке архивінен

Ол ұлттық киімнің қоғамдағы орнына тоқталып, оны тұрмысқа кеңінен енгізу қажеттігін атап өтті.

Фото Күміскүл Тұрсынбекованың жеке архивінен

— Қазір қысқа әрі батысқа еліктеген киім үлгісін таңдайтын жастар көбейді. Бұл — заман ағымының бір көрінісі шығар. Бірақ ұлттық болмыс пен әдепті ұмытпауымыз керек. Қазақы киімдер заманауи үлгіде жаңарып жатыр. Жастардың қызығушылығы бар, алайда оны тұрақты дағдыға айналдыру маңызды. Дүкендерде ұлттық киім жеткілікті, бірақ біз оларды көбіне мерекеде ғана киеміз. Ал шын мәнінде, күнделікті өмірде де киюге болады. Камзол, бүрмелі көйлек, кәмшат бөрік секілді киімдер тұрмыста қайта жаңғыруы тиіс, — дейді ол.

Фото Күміскүл Тұрсынбекованың жеке архивінен

Мектептен басталған игі бастама

Ұлттық құндылықтарды дәріптеу бағытында Түркістан қаласында Хамза атындағы № 2 жалпы білім беретін мектеп игілікті бастаманы қолға алған.

Фото Зүлфия Гафурованың жеке архивінен

Бүгінде білім шаңырағында бастауыш сынып оқушылары күнделікті ұлттық нақыштағы киім киеді.

Ал 5-11 сыныптарда әр жұма «Ұлттық киім күні» ретінде белгіленген.

Фото Зүлфия Гафурованың жеке архивінен

— Бұл бастама оқушылардың салт-дәстүрге деген құрметін арттырып, ұлттық мәдениетке қызығушылығын оятады. Балалар тек киім арқылы емес, оның мән-мағынасын түсіну арқылы ұлттық құндылықтарды бойына сіңіреді, — дейді директордың тәрбие ісі жөніндегі орынбасары Зүлфия Гафурова.

Мектеп мұғалімдері де осы үрдіске белсенді қатысып, ұлттық киімді күнделікті кию арқылы оқушыларға үлгі көрсетіп келеді.

Фото Зүлфия Гафурованың жеке архивінен

Мұндай бастамалар жас буынның ұлттық құндылықтарға деген көзқарасын қалыптастыруға тың серпін берері сөзсіз.

Фото Зүлфия Гафурованың жеке архивінен