Кендірлідегі жаңа әуежай қашан ашылады және қайда ұшуға болады

Кендірлі өзінің жеке әуежайының ашылуына дайындалып жатыр - жаңа әуе хабы ішкі және халықаралық рейстерге қызмет көрсететін болады. Жоба жылына 1,3 миллион жолаушыны қабылдауға қауқарлы, ал жоспарда қазірдің өзінде тоғыз бағыт бар. Tengri Travel құрылыстың қай кезеңде екенін және әуежайдың қашан іске қосылатынын анықтады.

Құрылыс жұмыстары қай сатыда?

Маңғыстау облыстық жолаушылар көлігі және автомобиль жолдары басқармасы қазіргі уақытта әуежайдың шамамен жартылай дайын екенін хабарлады.

"2026 жылғы 14 қыркүйектегі жағдай бойынша жобаның жалпы дайындығы 51 пайызды құрайды. Жасанды ұшу-қону жолағының дайындығы - 73,2 пайыз, перрон - 64,2 пайыз, рульдеу жолы - 67,6 пайыз, әуе вокзалы - 53,2 пайыз, әкімшілік ғимарат пен авиациялық қауіпсіздік қызметі - 61,6 пайыз, инженерлік-коммуникациялық инфрақұрылым - 96,3 пайыз", - деп бөлісті басқарма.

Басқарма мәліметінше, барлық құрылыс жұмысын 2026 жылдың желтоқсанында аяқтау жоспарланған. Одан кейін әуежай ресми түрде ашылып, жолаушылар рейстерін бастау үшін барлық қажетті рұқсат қағаздары мен сертификаттарды рәсімдеуге кіріседі.

Қандай рейстерді ашу жоспарланып отыр?

Ведомство өкілдері әуежайдың өткізу қабілеті жылына 1,3 миллион жолаушыны немесе сағатына 150 жолаушыны құрайтынын атап өтті.

Қазіргі таңда 6 ішкі және 3 халықаралық рейс ашу көзделіп отыр:

Астана; Алматы; Ақтөбе; Атырау; Орал; Қызылорда; Нүкіс; Баку; Астрахань.

Кендірлі әуежайының эскизі. Иллюстрация: Маңғыстау облыстық көлік басқармасы

Жаңа әуежай қандай болады?

Сонымен қатар жобада халықаралық терминал қарастырылған.

"Кендірлі курорттық аймағындағы әуежай ішкі және халықаралық әуерейстерге қызмет көрсетуге бағытталған. Әуежай инфрақұрылымының құрамында кедендік және шекаралық бақылау жүргізуге қажетті инфрақұрылымы бар халықаралық терминал жұмыс істейтін болады", - деп түсіндірді ведомство.

Кендірлі әуежайының эскизі. Иллюстрация: Маңғыстау облыстық көлік басқармасы

Сондай-ақ жоба бойынша авиациялық қауіпсіздік қызметі, әуе вокзалы, әкімшілік ғимарат және инженерлік-коммуникациялық инфрақұрылым қарастырылған.

Қазіргі уақытта ұзындығы 2200 метр болатын, Q-400, ATR және CRJ типті әуе кемелерін қабылдауға есептелген ұшу-қону жолағы салынып жатыр. Алайда келесі кезеңде оны үлкен көлемдегі ұшақтарды қабылдау үшін кеңейту жоспарланған.

"Келесі кезеңде Airbus A320 және Boeing 737 типті әуе кемелерін қабылдау мүмкіндігін қамтамасыз ете отырып, әуежай инфрақұрылымын кеңейту көзделіп отыр", - деді басқармадағылар.

Кендірлі әуежайындағы салынып жатқан ұшу-қону жолағы. Фото: Маңғыстау облыстық көлік басқармасы

Әуежай іске қосылғаннан кейін мұнда 182 жұмыс орнын ашу жоспарланған.

"Әуежай пайдалануға берілгеннен кейін 182 штатты қамтамасыз ету жоспарланып отыр. Персонал құрылымына әкімшілік-басқарушылық персонал, өндірістік және жолаушылар қызметі, перрондық қызмет көрсету бөлімі, ЖЖМ қызметі, сондай-ақ техникалық және қосалқы бөлімшелер кіреді", - деп атап өтті басқармада.

Құрылыстан кейін әуежайдың жағдайы қалай болады?

Әзірге әуежайды жеке инвесторларға немесе бөгде компанияға беру жоспарда жоқ. Нысанды әрі қарай басқару мәселесі, басқарманың хабарлауынша, кейінірек белгіленген тәртіппен қаралатын болады.

Әуежайдың өзін-өзі ақтауға шығу мерзімі де әзірге нақты емес. Бұл көрсеткіштер іске қосылғаннан кейінгі нақты жұмыс нәтижелеріне байланысты болады.

Тағы оқыңыз: Зайсандағы жаңа әуежай қандай болады: жоба туралы не белгілі?

Бізді Google-дың негізгі дереккөздер тізіміне қосыңыз

Қосу