Кентауға жылу беріле бастады

Кентаудағы №5 жылу энергия орталығы қалаға жылу бере бастады.

Екі жылға жоспарланған жөндеу жұмыстары кезінде қазандықтар қайта құрылып, жаңғыртудан өтті. Соңғы 10 жылдан бері жөнделмеген қазандықтардың  95 пайызы тозған еді. Жаңғырған жылу орталығы биыл алғаш рет әзірлік құжатын алды.

Соңғы 2 жылда жылу-энерго орталығындағы 6 қазандық жаңғыртылды. Биыл соңғы 2 қазандыққа ағымдағы жөндеу жұмыстары жүргізілді. Одан бөлек тағы 2 турбоагрегат жөнделді. Мамандар осының нәтижесінде қазандықтар жүз пайыз жаңартылып, автоматтандырылған басқару жүйесі енгізілгенін айтады. Оған қоса ұзындығы 45 шақырым жылу құбыры ауыстырылған.

Саяхат Саятұлы,  №5 Жылу энергия орталығының директоры:

- 21 қазан күні біз алғашқы 8-ші нөмірлі қазандықты іске қостық. Режимға шықтық. Бүгінгі күні 12-ші қазандықты дайындап жатырмыз. Сығымдаудан өткізіп, оны да іске қосамыз. 25 қазаннан бастап, әлеуметтік нысандарға жылу беріледі. 1 қараша аралығында толық үйлерге беріледі. Қазіргі таңда станция жылу беру маусымына жүз пайыз дайын .

Кентау жылу орталығы қаладағы 14 мыңға жуық абонентке қызмет көрсетеді. Оның ішінде 347 көпқабатты тұрғын үй, 108 бюджеттік мекеме бар.  

Ғалымжан Түгелов, қала әкімінің орынбасары:

- Бүгінгі күні қаламызда 130 шақырымдай ішкі құбырларымыз бар. Биылға қаржы бөліп, ақау шыққан магистралды құбырдың қажетті деген 1 шақырымнан астамын ауыстырдық. Ішкі орам жүйелерін екі кезеңге бөліп, 50 шақырымы ауыстырылды. Қазандықтар бүгін қосылғаннан кейін біз жылу беру маусымына өтуге дайынбыз.

Жалпы облыс бойынша жылыту маусымына 560 мың тонна көмір қажет. Бүгінге дейін соның 370 тоннасы жеткізілген. Одан бөлек өңірде 1 млн 830 мың тұрғын көгілдір отынмен қамтылған. Жауаптылар биыл 50 мың халқы бар 32 ауылға газ жеткізілгенін айтады. 

Зулфухар Жолдасов, облыс әкімінің бірінші орынбасары:

- Газды ауылдарға жеткізгенбіз, бірақ 18 мың абонент, үйлер бүгінге дейін газға қосылмай отыр. Біз қазір түсіндіру жұмыстарын жүргізіп жатырмыз. Одан басқа қыстың кезінде қауіпті жағдайлар бар газдан улану деген сияқты. ТЖД бірлесіп, қазір түсіндіру жұмыстарын жүргізіп жатырмыз. Тұрғындарға айтарым, мұржаларын, құбырларын қарап шығу керек. Әр үйді аралап, дайындығын қарап жатырмыз.

Облыс бойынша жылыту маусымы алғаш 8 ауданда басталды. Бүгін Түлкібас, Төлеби, Қазығұрт, Бәйдібек, Созақ, Сайрам аудандары мен Кентау қаласындағы қазандықтар жылу тарата бастады. Мамандар өңірде ауа райы әлі де жылы болғандықтан қалған аудан-қалаларда жылыту жүйесі 1 қарашаға дейін толық іске қосылатынын айтады.

Авторлары: Жандос Жұмабек, Ерболат Әбіш, Қуаныш Әбуов