Кибертұрақтылықты арттыру мәселесін талқылады

Іс-шара энергетика саласының критикалық инфрақұрылымының кибертұрақтылығын арттыруға, автоматтандырылған басқару жүйелерінің қауіпсіздігін қамтамасыз етуге, заманауи киберқауіптерге қарсы іс-қимыл бойынша практикалық дағдыларды дамытуға бағытталған.

Жиынға Жасанды интеллект және цифрлық даму вице-министрі Досжан Мұсалиев, Энергетика вице-министрі Бақытжан Ілияс, әл-Фараби атындағы ҚазҰУ-дың басқарма төрағасы – ректоры Жансейіт Түймебаев, Мемлекеттік техникалық қызметінің Басқарма төрағасы Асқар Жүнісбек, ақпараттық технологиялар саласының білікті мамандары, сарапшылар мен ғалымдар қатысты. 

Шараны ҚазҰУ ректоры Жансейіт Түймебаев құттықтау сөзбен ашып, киберқауіпсіздіктің қазіргі таңда ақпараттық технологиялар саласының ғана емес, ұлттық қауіпсіздікті, экономикалық тұрақтылықты және еліміздің цифрлық егемендігін қамтамасыз ететін стратегиялық бағытқа айналғанын атап өтті. 

«Бүгінде ҚазҰУ жасанды интеллект, цифрлық технологиялар, ақпараттық қауіпсіздік және жоғары өнімді есептеулер салаларындағы ғылыми- зерттеулерді белсенді түрде іске асырып жатыр. 2025 жылдың желтоқсан айында ҚР Энергетика министрлігі мен Әл-Фараби атындағы ҚазҰУ Салалық технологиялық құзыреттер орталығын құру туралы меморандумға қол қойды. Аталған орталық ғылыми-зерттеулердің оннан астам бағытын дамытуда. Олардың қатарында таза энергетика, дәстүрлі энергия өндіру, электр және жылу желілері, жер қойнауын пайдалану және геология, көмір химиясы, цифрлық технологиялар, жасанды интеллект және энергетикалық инфрақұрылымның киберқауіпсіздігі бағыттары бар», – деді ректор. 

Өз кезегінде ҚР Жасанды интеллект және цифрлық даму вице-министрі Досжан Мұсалиев елімізде цифрлық трансформацияны жеделдету мен жасанды интеллект технологияларын дамыту мемлекеттік саясаттың басым бағыттарының бірі екенін жеткізді.

«Мемлекет басшысы биылғы жылды цифрландыру және жасанды интеллект жылы ретінде айқындап, алдағы үш жыл ішінде Қазақстанды толыққанды цифрлық мемлекетке айналдыру міндетін қойды. Осыған байланысты жасанды интеллект, ақпараттық технологиялар және киберқауіпсіздік мәселелеріне ерекше көңіл бөлініп отыр. Мұндай кибероқу-жаттығулар стратегиялық маңызы бар инфрақұрылым нысандарының қорғалу деңгейін арттыруға және жоғары білікті мамандар даярлауға елеулі үлес қосады», – деді вице-министр. 

Іс-шарада ҚР Энергетика вице-министрі Бақытжан Ілияс сөз сөйлеп, энергетикалық инфрақұрылымның киберқауіпсіздігін қамтамасыз етудің маңыздылығына тоқталды.

«Энергетикалық инфрақұрылымның сенімді әрі үздіксіз жұмыс істеуі елдің энергетикалық қауіпсіздігі мен экономикалық тұрақтылығының басты кепілі. Сондықтан ақпараттық және технологиялық жүйелерді заманауи киберқауіптерден қорғау, сала мамандарының біліктілігін арттыру және тәжірибелік кибероқу-жаттығуларды тұрақты өткізу ерекше маңызға ие. Осы бағыттағы мемлекеттік органдар, ЖОО және салалық ұйымдар арасындағы ынтымақтастық киберқауіпсіздік мәдениетін қалыптастыруға және еліміздің аса маңызды инфрақұрылымының қорғалу деңгейін арттыруға мүмкіндік береді», – деді вице-министр Бақытжан Ілияс. 

Шараның сараптамалық бөлімінде энергетика саласын цифрландыру кезіндегі киберқауіпсіздік міндеттері, сондай-ақ энергетикадағы коммуникацияларды қорғауға арналған посткванттық және квантқа төзімді шешімдер бойынша баяндамалар ұсынылды.

Кибероқу-жаттығулардың практикалық бөлігінде қатысушылар нақты өндірістік жағдайларға жақын сценарийлер бойынша жұмыс істеп, кибершабуылдарды анықтау, талдау, қауіптердің алдын алу және ақпараттық жүйелерді қорғау бойынша тәжірибелік тапсырмаларды орындады.

Бағдарлама аясында топтық жарыстар, киберқауіпсіздік бойынша оқу сессиялары, криптография және деректерді қорғау технологияларына арналған практикалық сабақтар ұйымдастырылды. Іс-шара екі күнге жоспарланған.