Ким Чен Ын президенттік сайлауда 100 пайыз дауыс жинап, жеңіске жетті

КХДР-дың жоғарғы көшбасшысы Ким Чен Ын бастаған Кореяның Еңбек партиясы парламенттік сайлауда 99,93% дауыс жинап, жеңіске жетті. Бұл туралы The Sunday Guardian басылымы хабарлады.

Сайлау нәтижесі бойынша бар болғаны 0,07% сайлаушы қарсы дауыс берген.

2026 жылғы 15 наурызда өткен сайлауда КХДР Жоғарғы халық жиналысының 15-шақырылым депутаттары таңдалды. Нәтижесінде билік партиясы мен оның одақтастары парламенттегі барлық 687 орынды иеленді.

Сарапшылардың айтуынша, бұл сайлаудағы ең назар аударарлық жайттардың бірі – кадрлық құрамның айтарлықтай жаңаруы. Депутаттардың 70%-дан астамы – жаңа тұлғалар. Бұл елдегі саяси жүйеде елеулі қайта құрылым жүріп жатқанын көрсетеді.

Мамандар бұл өзгерістер Ким Чен Ынға бұрынғы ықпал топтарын әлсіретіп, өзіне адал кадрларды алға шығаруға мүмкіндік береді деп есептейді. Мәселен, оның жақын серігі Чо Ён Вон парламентте маңызды қызметке тағайындалуы мүмкін.

Жаңа құрамға Ким Чен Ынның қарындасы Ким Ё Чжон мен сыртқы істер министрі Чхве Сон Хве енген. Ал тәжірибелі саясаткерлердің бірі Чхве Рён Хе секілді тұлғалар негізгі лауазымдардан шеттетілген.

КХДР – әлемдегі ең жабық әрі оқшауланған мемлекеттердің бірі. Ел ядролық бағдарламасына байланысты ұзақ уақыттан бері халықаралық санкциялар қысымында отыр. Сонымен қатар елде билік мұрагерлік жолмен беріліп, көшбасшылардың жеке тұлғасына табыну кеңінен таралған. Қазіргі басшы – Ким Чен Ын.