Кітап оқитын ұлт қалыптастыру: жаңғырған кітапханалар және жаңа мәдени серпін

Ресми дерек бойынша бүгінгі таңда еліміздегі кітапханаларда 72 мыңнан астам кітап қоры бар, оларды пайдаланатын үш мыңнан аса азамат бар көрінеді.

Жиырма миллион халқы бар Қазақстан үшін бұл тым аз көрсеткіш екені рас. Алайда кітапханаға бару мәдениеті кенжелеп тұрғанымен, оқырман санын аз деп айтуға келмес. Кітап дүкендері сөрелеріне телмінген жастарды бүгінде жиі кездестіруге болады. Десе де кітап мәдениеті кітапханадан басталатыны анық және білім алу қолжетімді болғаны абзал. Кітапханаға келген адам жайлы, жарық, әдемі ғимаратқа тап болса, өзін кітаппен қоршап, жұмсақ орындыққа жайғасып, білім тұңғиығына сүңгісе, нұр үстіне нұр болмас па еді?! Бұл оқырман санын арттырып, кітап оқуды трендке айналдырып, жас ұрпақтың санасында кітап оқу туралы жағымды пікір қалыптастырады.
Осы ретте  Мемлекет басшысы Қасым-Жомарт Тоқаев жолдауында да, Ұлттық Құрылтайда да, Үкімет мінберінен де бұқаралық масштабта жаппай кітап оқуды қалыптастыру туралы айтып жүр.

«Біз, ең алдымен, жастарды кітап оқуға баулуымыз керек. Сонда жаппай кітап оқитын ұлтқа айналамыз», - деп айтқан еді ол өз сөзінде. 

Сондықтан да елімізде қазір Қазақстан Республикасы Мәдениет және ақпарат министрлігі әзірлеген «Қазақстанның жалпыға қолжетімді кітапханаларын жаңғыртудың 2025–2027 жылдарға арналған жол картасы» жүзеге асырылуда. Жоба аясында ғимараттардың материалдық-техникалық базасы жаңартылып, қызмет көрсету деңгейі жоғарылайды деп жоспарлануда. Сонымен қатар цифрлық сервис пен электронды ресурстар енгізіліп, қолжетімді әрі ыңғайлы көпфункциялы кеңістіктер жасалады.

Қорыта айтқанда, атқарылып жатқан жұмыстар аз емес, тек нәтижесі ауқымды, сапалы, пайдалы болуы тиіс. Қазақстан Президент айтқандай кітап оқитын ұлтқа айналғанда халықтың сана-сезімі жоғары, ойлы, парасатты елге айналады.