Кітапты көп оқығанға грант беріледі

Атырау облысы әкімінің орын­басары Дарын Ша­мұратовтың ай­туын­­ша, «Кітап оқитын ұлт» зият­­керлік-ағартушылық жоба­сы аясында бірнеше мақсат көз­дел­ген. Біріншіден, өңірде кітап оқу мәдениетін жүйелі түрде қалып­тастыруға басымдық беріледі. Екін­шіден, білімге құштар қоғамды да­мытуға назар аударылады. Үшін­шіден, мемлекеттік және білім мекемелерін, мәдениет ошақтары мен азаматтық қоғамды кітап оқу жобасына атсалысуға бұру жоспарланыпты.

«Кітап оқу ұлттың рухани, интеллектуалдық әлеуетін арттырады. Сондықтан қолға алынып отырған бұл жоба – өңірдің рухани әлеуетін көтеруге бағытталған маңызды қадам. Мұндай бастама қоғамда білім мен мәдениетке деген құрметті нығайтып, кітап оқуды өмір салтына айналдыруға мүмкіндік береді», дейді Д.Шамұратов.

«Кітап оқитын ұлт – Читающая нация» қоғамдық қорының ат­қарушы директоры Аян Сақошевтың дерегіне қарағанда, аталған жоба өткен жылы Қостанай, Қарағанды облысы мен Шымкент қаласында қанатқақты режімде сынақтан өткен. Енді жинақталған тәжірибе негізінде жоба тетіктері жетілдіріледі.

«Біздің мақсатымыз – Қазақ­станды әлемдегі кітапты ең көп оқитын 10 мемлекеттің қатарына енгізу. Бала кезден кітапты тұрақты оқу дағдысы қалыптасса, ұлттың интеллектуалдық әлеуетін көтеріп, рухани құндылықтарды нығайта аламыз», дейді А.Сақошев.

Әкім орынбасарының пікірін­ше, өңірде осы кезге дейін кітап оқуды насихаттайтын бірнеше жоба жүзеге асырылған. Енді қаржыландыру, жобалық кеңсе құру мәселесі шешімін табады. Жоба­ның жұмысын үйлестіру үшін облыстық білім басқармасының әдістемелік орталығы жанынан арнайы жобалық кеңсе құрылады. Кеңсенің үйлестірушілері жеті бағыт бойынша облыстық білім, мәдениет және тілдерді дамыту, ішкі саясат басқармаларымен бірлескен жұмысты ұйымдастырады.

Аталған жобаға С.Өтебаев атын­дағы Атырау мұнай және газ университетінің ректоры Гүлзада Шакуликова қолдау көрсеткелі отыр. Қазір мұнда кітап оқуға құмар студенттерді ынталандыру шара­лары қолға алыныпты.

«Университетте кітап оқитын сту­денттерді ынталандырып келе­міз. Енді «Кітап оқитын ұлт» рес­публикалық жобасының жеңім­паз­дары үшін үш білім грантын ұсы­намыз. Бірінші, екінші және үшінші орын иегерлеріне тегін жоғары білім алуына мүмкіндік беруге дайынбыз. Бұл кітап оқуға, рухани кемелденуге құштар жастарды қолдаудың нақты көрінісі болады», дейді Г.Шакуликова.

Атырау облысы